Dyfarnwraig: ‘Ambell i brofiad annymunol’

Diweddarwyd  


Cerdyn coch
“Chwerthin” yw’r unig ffordd all un dyfarnwraig ymdopi â’r gwawd y mae hi’n ei wynebu ar y maes chwarae.

Dywedodd Chloe Lloyd, 23, o’r Trallwng, ei bod yn cael derbyniad “da iawn gan y mwyafrif” ond bod “gan rai pobol broblem” â’r hyn y mae hi yn ei wneud.

Mae Chloe Lloyd yn fyfyrwraig yn ei trydedd flwyddyn yn UWIC yng Nghaerdydd ac yn ei hamser sbâr mae hi’n dyfarnu gemau pêl droed dynion yng nghynghrair Cymru Alliance.

Mae hi wedi bod yn dyfarnu ers wyth mlynedd, ar ôl cael ei chynghori i roi’r gorau i chwarae’r gêm ar ôl dioddef anaf.

“Y peth pwysicaf yw bod gan bwy bynnag sy’n dyfarnu wybodaeth drylwyr am y gêm,” meddai.
“Ond rydw i wedi cael rhai profiadau annymunol.

“Unwaith fe wnaeth chwaraewr ysgwyd fy llaw – ac yna’n gofyn i mi am gusan. Fe ddywedes i wrtho nad oedd yn mynd i fod yn lwcus,” meddai cyn dweud ei bod yn “trio chwerthin” a “troi’r peth yn jôc”.

‘Symud ymlaen’

Mae dyfarnwyr benywaidd wedi cael llawer iawn o sylw dros y dyddiau diwethaf ar ôl sylwadau y cyflwynwyr Sky Sports, Andy Gray a Richards Keys, am lumanwraig.

Fe gafodd Andy Gray a Richard Keys eu recordio heb yn wybod iddynt yn trafod y penderfyniad i benodi Sian Massey yn lumanwraig yn ystod y gêm yn Uwch Gynghrair Lloegr.

Roedd y cyflwynwyr wedi dweud fod angen i rywun fynd i lawr i esbonio’r rheol camsefyll iddi.

“Roedd sylwadau’r cyflwynwyr yn rhywiaethol. Ond, mae’n bryd anghofio’r peth a symud ymlaen,” meddai Chloe Lloyd.

“Ond yn dilyn beth ddigwyddodd rydw i’n gobeithio y bydd mwy o ferched yn cymryd diddordeb mewn dyfarnu ac y bydd yna ragor yn cael eu recriwtio.”

‘Eisiau parhau i ddyfarnu’

Mae Chloe Lloyd yn dyfarnu gemau pêl droed “bob penwythnos” ac mae’n gobeithio parhau i wneud hynny ar ôl gorffen UWIC.

Ar hyn o bryd, mae yn ei thrydedd flwyddyn yn astudio cwrs chwaraeon yn UWIC. “Pan ydw i’n gadael, y nod yw parhau i ddyfarnu cyhyd ag ydw i’n gallu.”

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones