Teyrngedau i’r Athro Steven Edwards, “gŵr hynaws a hynod ddeallus”

Diweddarwyd am  
Yr Athro Steven Edwards

Yr Athro Steven Edwards

Llun: Tŷ Tawe

Mae teyrngedau wedi’u rhoi i’r Athro Steven Edwards, darlithydd ym Mhrifysgol Abertawe, sydd wedi marw’n dilyn salwch byr.

Roedd yn ddarlithydd cyfrwng Cymraeg yng Ngholeg y Gwyddorau Dynol ac Iechyd cyn ymddeol yn ddiweddar.

Roedd hefyd yn ymchwilydd uchel ei barch ym maes athroniaeth a moeseg iechyd.

Yn frodor o Salford ger Manceinion, aeth ati i ddysgu’r Gymraeg cyn mynd yn ei flaen i gyhoeddi erthyglau ymchwil ac ysgrif ar gyfer y cyfnodolyn Efrydiau Atronyddol yn yr e-gyhoeddiad Gwerddon, yn ogystal ag ysgrif ar ‘Newyddion Ffug’ yn y gyfrol Llenydda, Gwleidydda a Pherfformio fel rhan o’r gyfres Astudiaethau Athronyddol.

Ymhlith ei brif ddiddordebau academaidd roedd diogelu plant wrth eu gwneud yn destun ymchwil clinigol, y dadleuon dros ddarparu canolfannau cefnogi hunanladdiad, ac fe gyfrannodd bapur briffio i Lywodraeth Cymru ar ystyriaethau moeseg wrth gynaeafu organau’n ddi-ofyn.

Yn fwyaf diweddar, roedd yn diwtor Cymraeg yn y brifysgol, ac yn wirfoddolwr gweithgar a phoblogaidd yng Nghanolfan Tŷ Tawe.

Roedd hefyd yn adnabyddus fel canwr mewn band pync ar y sîn leol ym Manceinion yn y 1980au.

‘Colli presenoldeb’

Wrth dalu teyrnged, dywed Academi Hywel Teifi ei fod e wedi “cefnogi eraill i ddysgu’r iaith ac elwa o’i chyfoeth fel y gwnaeth ef”.

“Yn ŵr hynaws a hynod ddeallus, bydd colli presenoldeb tawel a doeth Steve i’w deimlo’n fawr gan staff yr Academi.

“Byddwn yn cofio’n annwyl iawn amdano ac anfonwn ein cydymdeimladau dwysaf at Jane [ei wraig] a’i deulu.”

 ‘Cyfaill annwyl’

Mewn teyrnged arall, dywed Canolfan Tŷ Tawe ei fod yn “gyfaill annwyl i Ganolfan Tŷ Tawe, yn aelod o gymuned Gymraeg Abertawe ac yn ffrind hoffus i nifer lawer”, ac y byddai “colled fawr ar ei ôl”.

“Yn ddiweddarach, wedi iddo ymddeol fel Athro Athroniaeth ym Mhrifysgol Abertawe, mi ddechreuodd wirfoddoli yn Siop Tŷ Tawe gan ail-gydio mewn tiwtora i Ddysgu Cymraeg Ardal Bae Abertawe.

“Daeth ei wyneb yn gyfarwydd i lawer eto wrth iddo wasanaethu y tu ôl y cownter ac yn y Siop Siarad [bore coffi] yn ei fodd amyneddgar, pwyllog.

“Er na fyddai’n un i frolio, roedd Steve yn ddyn o amryw ddoniau – yn gerddor pync ym Manceinion yr 80au ac yn arbenigwr academaidd ym moesoldeb meddygol.

“Roedd ei gariad at yr iaith ynghlwm â’i ddealltwriaeth o athroniaeth J.R. Jones a’i werthfawrogiad o lenyddiaeth Kate Roberts.

“Ond mi gofiwn ef yn bennaf oll fel dyn hoffus, caredig oedd wastod yn barod i wrando ac i gynnig cymorth.

“Cofiwn ef a’i rinweddau yn arbennig yn ystod y cyfnod anodd hwn.

“Anodd iawn fydd ail-agor drysau Tŷ Tawe wedi’r argyfwng heb ei gwmni hael.

“Anfonwn ein cydymdeimlad llwyraf i’w wraig Jane a’r teulu yn eu profedigaeth. Cysga’n dawel Steve.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn