Mae bellach wedi dod i’r amlwg bod 84 wedi marw â Covid-19 yn ysbytai’r gogledd yn ystod y mis diwetha’ – swm sylweddol uwch na’r ffigwr swyddogol hyd at heddiw.

Mae ffigurau diweddaraf Iechyd Cyhoeddus Cymru yn nodi bod 88 o bobol wedi marw o’r coronafeirws yn ysbytai’r gogledd, ac mae’n debyg bod 84 o’r rhain heb eu cofnodi tan heddiw.

Daw hyn wedi i gylchgrawn Golwg dynnu sylw at y lefel isel o farwolaethau wedi eu cofnodi yn y gogledd gan y corff Iechyd Cyhoeddus Cymru ar ddechrau’r wythnos.

13 sydd wedi marw o COVID-19 yn y gogledd, Powys, Ceredigion, Sir Benfro a Sir Gaerfyrddin – yn ôl cofnodion swyddogol

Roedd tabl ar ddydd Mercher yn dangos mai dim ond 13 o farwolaeth oedd wedi’u cofnodi yn ardaloedd y gogledd, Powys, Ceredigion, Sir Benfro a Sir Gaerfyrddin (oll gyda’i gilydd).

Heddiw mae Iechyd Cyhoeddus Cymru wedi cyhoeddi bod 88 wedi marw yn y gogledd yn unig, ac 84 o’r rheiny wedi digwydd rhwng Mawrth 20 ac Ebrill 22, ac mae ansicrwydd o hyd ynghylch pam y bu oedi wrth eu cyhoeddi.

Mae golwg360 wedi gofyn i Lywodraeth Cymru, Iechyd Cyhoeddus Cymru a Bwrdd Iechyd Betsi Cadwaladr am ymateb.

Galw am esboniad

Mae Siân Gwenllian, Aelod Cynulliad Plaid Cymru Arfon, wedi rhannu ei gofidion am y sefyllfa, ac wedi galw am esboniad.

“Mae’n fy mhryderu mai dim ond yn awr mae’r nifer sylweddol yma o farwolaethau oddi fewn i Fwrdd Iechyd Betsi Cadwaladr (bwrdd y gogledd) yn dod i’r fei,” meddai.

“Mae angen esboniad arnom yn syth, gan y bwrdd iechyd, Iechyd Cyhoeddus Cymru, a Llywodraeth Cymru ynghylch pam bod hyn wedi cael ei than adrodd am fis.

“Mae cynnig darlun llawn o’r achosion yn allweddol er mwyn sicrhau bod y cyhoedd yn dal i hyderu ynom, ac fel bod gweinidogion yn gwybod sut i wneud penderfyniadau hollbwysig wrth lacio’r lockdown.”

Ymateb Bwrdd Iechyd y gogledd

Dywedodd llefarydd ar ran Bwrdd Iechyd y Gogledd:

“Adroddwyd yn gyhoeddus ar fanylion nifer y marwolaethau yng ngogledd Cymru am y tro cyntaf heddiw.

“Oherwydd problemau a ganfuwyd yn ein system adrodd, mae diweddariad heddiw yn cynnwys croniad o achosion lle bo claf wedi marw gan brofi’n bositif am COVID-19 ar yr un pryd.

“Mae’r holl ddata’n ymwneud ag achosion COVID-19 a marwolaethau wedi’i gofnodi’n gywir, ac mae’r broblem a ganfuwyd yn ymwneud â sut caiff y data hwn ei rannu. Mae’r broblem hon wedi’i datrys bellach.”

Ymateb Iechyd Cyhoeddus Cymru

Dywedodd llefarydd ar ran y corff Iechyd Cyhoeddus Cymru:

“Mae’r cynnydd cyflym yn nifer y meirw oherwydd oedi yn y broses o adrodd am yr achosion hyn.

“Ar hyn o bryd mae Iechyd Cyhoeddus Cymru yn gweithio gyda’i asiantaethau partner i sicrhau ein bod yn darparu’r wybodaeth fwyaf cywir, ddiweddaraf sydd ar gael ar COVID-19 i’r cyhoedd.”

Ffigurau diweddaraf

Bwrdd Iechyd Marwolaethau *
BIP Aneurin Bevan

(Gwent)

 213
BIP Betsi Cadwaladr

(Gogledd Cymru)

 88
BIP Caerdydd a’r Fro 157
BIP Cwm Taf Morgannwg

(Rhan helaeth o’r Cymoedd)

 148
BIP Hywel Dda

(Dyfed)

 **
BIA Powys **
BIP Bae Abertawe

(Abertawe, Castell-Nedd a Phort Talbot)

 131
Cyfanswm 751

 

* Roedd y wybodaeth uchod yn gywir ar Ebrill 23

** Mae nifer y meirw yn ardaloedd y Byrddau Iechyd yn gallu bod yn isel iawn, yn ôl y corff Iechyd Cyhoeddus Cymru, ac felly ni fydd yr union ffigwr yn cael ei ddatgelu er mwyn cadw’r meirw yn anhysbys.