Mwy yn cefnogi annibyniaeth i Gymru, meddai Yes Cymru

Diweddarwyd  
Annibyniaeth

Baner annibyniaeth yng ngorymdaith Pawb Dan Un Faner yng Nghaerdydd

Llun: Yes Cymru Abertawe

Fe fu twf sylweddol yn nifer y bobol sy’n cefnogi annibyniaeth i Gymru, yn ôl Yes Cymru.

Daw’r datganiad ar drothwy Cyfarfod Cyffredinol y mudiad annibyniaeth yng Nghanolfan Soar, Merthyr Tudful ddydd Sadwrn nesaf (Ionawr 25).

Ers y cyfarfod cyffredinol diwethaf y llynedd, mae nifer o orymdeithiau cenedlaethol wedi’u cynnal, a’r rheiny wedi sbarduno aelodau a chefnogwyr newydd.

“Yn 2019, daeth miloedd allan i’r strydoedd i ddatgan eu dymuniad i weld Cymru annibynnol yng ngorymdeithiau AUOB Cymru – rhywbeth sydd erioed wedi digwydd o’r blaen – ac mae trafod annibyniaeth i Gymru yn awr yn dod yn rhan naturiol o fywyd a sgwrs pobol Cymru o ddydd i ddydd,” meddai Siôn Jobbins, cadeirydd Yes Cymru.

“Fe wnaeth cyn-Brif Weinidog Cymru, Carwyn Jones, siarad yn un o gyfarfodydd cyhoeddus Yes Cymru yn yr Eisteddfod Genedlaethol, ac fe ddangosodd arolwg barn YouGov ym mis Medi 2019 y byddai rhwng 32% a 41% yn pleidleisio dros annibyniaeth mewn refferendwm yn ddibynnol ar y cwestiwn.”

Yn ôl Siôn Jobbins, mae nifer aelodau Yes Cymru wedi treblu i oddeutu 2,500 ers y cyfarfod cyffredinol hwnnw, a grwpiau lleol wedi’u sefydlu ar hyd a lled Cymru.

“Bu twf anferthol hefyd ar y cyfryngau cymdeithasol, a nifer ein dilynwyr ar Twitter yn dyblu, o 10,000 i 20,000 mewn blwyddyn.”

Siaradwyr

Yn dilyn y cyfarfod cyffredinol, fe fydd nifer o sesiynau ‘Sgwrs Annibyniaeth’ yn cael eu cynnal.

Y siaradwyr fydd David Buttress (Cyfleoedd a ddaw i fusnes gydag annibyniaeth), Angharad Mair (y cyfryngau), Carolyn Hitt (rygbi ac annibyniaeth), Mark Evans (pêl-droed ac annibyniaeth) a Mark Hooper (Banc Cambria).

Yn ôl Siôn Jobbins, mae safon y siaradwyr “yn dyst i’r newid ymysg pobol Cymru”.

Fe fydd gorymdeithiau cenedlaethol yn cael eu cynnal eleni yn Wrecsam, Tredegar ac Abertawe.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones