Mae teulu dyn sydd ar goll o ardal Maesteg yn apelio o’r newydd am wybodaeth ar ei ben-blwydd yn 64 oed.
Does neb wedi gweld Keith Price ers 10 o’r gloch ar fore dydd Mawrth, Awst 13.
Mae ganddo fe glefyd y siwgr.
“Mae Keith yn 64 oed heddiw ac fe ddylai fod yn dathlu ei ben-blwydd gyda’i deulu a’i ffrindiau ond yn hytrach, maen nhw’n pendroni ynghylch ble mae e a beth sydd wedi digwydd iddo fe.
“Rydym yn parhau i ymchwilio i’w ddiflaniad ac yn annog unrhyw un sydd â gwybodaeth ynghylch ble mae e i gysylltu â Heddlu’r De.”
Neges y teulu
Mae’r teulu wedi apelio’n uniongyrchol ar iddo fe ddod adref.
“Keith, rydym yn dy garu ac yn poeni amdanat ti,” meddai datganiad.
Dylai unrhyw un â gwybodaeth gysylltu â’r heddlu ar 101.
