Enw uned iaith newydd ddim digon “secsi”

Diweddarwyd am  

Cynog Dafis

Llun: Plaid Cymru ar Flickr

Mae un o hoelion wyth Plaid Cymru wedi cwyno nad ydy’r enw newydd ar gyfer Uned Gynllunio Ieithyddol o fewn Adran Gymraeg Llywodraeth Cymru, yn ddigon “secsi”.

Bu Cynog Dafis yn Aelod Cynulliad a Seneddol tros Geredigion, ac mae bellach yn un o geffylau blaen Dyfodol i’r Iaith.

Dyma’r mudiad sydd wedi bod yn pwyso ar Lywodraeth Cymru i roi fwy o bwyslais ar gynllunio ieithyddol wrth geisio creu miliwn o siaradwyr Cymraeg erbyn 2050.

Roedd Cynog Dafis yn croesawu’r cyhoeddiad ar Faes y Brifwyl yn gynharach yn yr wythnos, bod yr uned am gael ei sefydlu.

“Mae yna arwyddion eu bod wedi gwrando,” meddai Cynog Dafis, “ac rydym yn falch o gyfeiriad y symudiad yna.

“Mae’r syniad o gael pennaeth i’r uned yma, a bod yr uned yma yn mynd i fod yn llawer iawn mwy cyhoeddus ac amlwg … a’r holl bwyslais ar gynllunio ieithyddol cadarnhaol. Mae’r rhain i gyd yn bethau i’w croesawu.

“Beth mae’n rhaid i ni aros amdano i’w weld, yw faint mewn gwirionedd o adnoddau mae’r Llywodraeth yn gallu rhoi tu ôl i’r holl beth.

“Er enghraifft, ym maes addysg rydym ni’n barnu bod angen rhywbeth tebyg i £40m y flwyddyn ar gyfer datblygu gweithlu addysg Gymraeg. Dydyn ni ddim yn gwybod heddiw, naill ffordd neu’r llall, p’un ai fydd y fath yna o adnoddau ar gael.”

Ar ôl cyhoeddi’r camau newydd cafwyd cwestiynau lu yn y lansiad, a dywedodd Cynog Dafis bod enw’r uned, ‘Prosiect 2050’, ddim yn ddigon “secsi”.

Yn ymateb, dywedodd llefarydd ar ran Llywodraeth Cymru:

“Croesawyd sefydliad Prosiect 2050 yn eang ac rydym yn edrych ymlaen at weithio ar draws Llywodraeth, gyda sefydliadau fel Dyfodol yr Iaith a phobl ar draws Cymru i wireddu ei amcanion. Y gwaith sydd i’w wneud yw’n flaenoriaeth.”

Mwy am gynlluniau’r Llywodraeth ar gyfer yr iaith yn y rhifyn estynedig, eisteddfodol o gylchgrawn Golwg

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer