AS Maldwyn, Glyn Davies, am ymddeol

 
Glyn Davies a Theresa May ochr yn ochr

Glyn Davies gyda Theresa May

Llun oddi ar wefan www.conservatives.com

Fe fydd Aelod Seneddol Maldwyn, Glyn Davies, yn ymddeol adeg yr Etholiad Cyffredinol nesaf yn 75 oed.

Mae’r Ceidwadwr wedi cynrychioli Sir Drefaldwyn yn San Steffan ers 2010 a, chyn hynny, roedd yn Aelod Cynulliad dros Ganol a Gorllewin Cymru o 1999 i 2007.

Cyn ei yrfa mewn gwleidyddiaeth, ffermio oedd Glyn Davies ac fe dreuliodd gyfnod yn Gadeirydd Bwrdd Datblygu Cymru Wledig a hefyd yn Aelod o Awdurdod Datblygu Cymru a Bwrdd Croeso Cymru.

“Dyn lleol”

Fe fydd swyddogion Cymdeithas Geidwadol Sir Drefaldwyn nawr yn dechrau proses ddethol ffurfiol er mwyn dewis ymgeisydd i gymryd lle’r Aelod Seneddol.

Yna bydd Aelodau Cymdeithas Geidwadol Sir Drefaldwyn yn pleidleisio ar restr fer o ymgeiswyr.

“Mae’n bleser mawr cael Glyn Davies fel ein Haelod Seneddol ers mis Mai 2010, a thrwy ddim llai na tri Etholiad Cyffredinol,” meddai Cymdeithas Geidwadol Sir Drefaldwyn.

“Mae Glyn yn ddyn lleol go iawn – wedi ei eni, ei addysgu ac wedi byw ei fywyd cyfan yma yn Sir Drefaldwyn – fu neb erioed yn fwy ymroddedig i’w Aelodau a’i etholwyr yma.”

Yngyrchu

Yn ystod y blynyddoedd diwetha’, roedd Glyn Davies wedi bod yn amlwg yn ymgyrchu i sicrhau dyfodol Gwasanaethau Damweiniau ac Achosion Brys yn Ysbyty Amwythig, sy’n trin llawer o gleifion o’i etholaeth.

Mae hefyd wedi gorfod delio â gwrthdaro tros gynlluniau i godi ffermydd gwynt, gan fod yn rhan o frwydr i atal cynnydd mewn tyrbinau a rhwystro codi peilonau ar draws y Canolbarth i gario’r trydan.

Anaml y mae wedi gwrthryfela yn erbyn y chwip Doriaidd yn Nhŷ’r Cyffredin ond roedd wedi pleidleisio yn erbyn cael ymchwiliad i Ryfel Irac ac, ar y cyfan, wedi pleidleisio yn erbyn priodasau un rhyw.

Y sedd

Roedd gan Glyn Davies fwyafrif o fwy na 9,000 a mwy na 26% yn yr Etholiad Cyffredinol diwetha’ ond fe fydd y Democratiaid Rhyddfrydol yn gobeithio y gallen nhw ei herio – roedd wedi ei chipio oddi arnyn nhw a’r AS lliwgar Lembit Opik yn 2010 gyda mwyafrif o ychydig tros 1,000.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer