“Rhaid cynnal y brifwyl yn Llanrwst… neu ei chanslo hi”

Diweddarwyd  

Mae Maer Llanrwst yn herio trefnwyr yr Eisteddfod Genedlaethol i gadarnhau unwaith ac am byth mai yn y dref honno y byddan nhw’n cynnal Maes y brifwyl eleni – neu ganslo’r holl ddigwyddiad.

Mae yna amheuon mawr yn y dref ac yn yr ardal ehangach ers i’r caeau sydd wedi’u dewis i fod yn gartref i’r brifwyl ddod dan ddŵr yn dilyn stormydd diwedd mis Mawrth eleni.

Fe ddaeth hi’n glir bryd hynny fod yr Eisteddfod Genedlaethol yn cael problem i gael yswiriant ar gyfer y tir sy’n rhan o orlifdir afon Conwy, ac efallai y byddai’n rhaid iddyn nhw ystyried opsiynau “edrych y tu hwnt” i’r safle presennol.

At hynny, mae rhai wedi awgrymu y dylai’r brifwyl – gyda llai na phedwar mis tan wythnos gyntaf Awst – ystyried defnyddio safle prifwyl 1995 ar gyrion Abergele. Mae hynny wedi gwylltio pobol yn ardal Llanrwst.

Er i golwg360 wneud cais i holi Prif Weithredwr yr Eisteddfod Genedlaethol, Betsan Moses ynglŷn â’r sefyllfa, dyw’r , doedden nhw ddim am wneud sylw pellach ar y mater.

Mae disgwyl i’r brifwyl ymweld â Sir Conwy – ardal eang sy’n mynd o Ysbyty Ifan wrth fynyddoedd y Mignaint hyd at Landudno ar lan y môr, rhwng Awst 3 a 10.

“O’r badell ffrio i’r tân”

Yn ôl y Cynghorydd Ian Jenkins, Maer Llanrwst, mae popeth “i fyny yn yr awyr” ar hyn o bryd, gyda busnesau lleol a sefydliadau eraill – sy’n bwriadu cynnal digwyddiadau ymylol yn y dref – yn dal i aros am gadarnhad am safle’r brifwyl.

Mae’n dweud nad oes “unlle yn well” na’r safle presennol – ar fin y ffordd o Lanrwst i gyfeiriad Betws-y-coed – a bod trigolion Llanrwst yn gadarn yn erbyn y syniad o symud y Maes i ardal arall.

“Mae ganddyn nhw ond dau ddewis yn fy marn i, ei chynnal hi yn Llanrwst neu ei chanslo hi,” meddai wrth golwg360. “Ond dw i ddim yn gweld eu bod nhw am ei chanslo hi…

“Os ydan nhw’n symud yr Eisteddfod o Lanrwst fe fyddan nhw’n mynd o’r badell ffrio i’r tân.

“Mae yna bobol sy’n barod i ymddiriedoli [sic] yn y gwaith stiwardio ac yn y blaen, i gyd ar bigau’r drain ar hyn o bryd… Os ydi’r Eisteddfod ddim yn dod i Lanrwst, fyddan nhw ddim ar gael.”

Wrth ddadlau yn erbyn symud y Maes, mae nifer yn tynnu sylw at y ffaith fod Llanrwst a’r pentrefi Cymraeg o’i chwmpas eisoes wedi cyrraedd eu targedau ariannol, tra bod Abergele a’r ardaloedd mwy Seisnig eu hiaith tua’r glannau yn Sir Conwy, yn cael eu gweld fel eisteddfodwyr llai brwd wrth godi arian.

Y Maes presennol “yn berffaith saff”

Er i’r Maes presennol gael ei effeithio gan lifogydd yn ddiweddar, mae Ian Jenkins yn mynnu mai digwyddiad “unwaith mewn can mlynedd” oedd hynny.

“Does yna’r un wedi bod cyn waethed na’r [llifogydd] a gafwyd pythefnos yn ôl,” meddai. “Mae’r cae yna yn berffaith addas… mae o’n hollol dderbyniol ynghanol yr ha’.

“Biwrocratiaeth sy’n stopio’r peth rhag digwydd, dw i’n meddwl, dim y lleoliad…

“Mae’r busnes llifogydd yma wedi cael y bobol yswiriant i feddwl ‘oh my god’, a phethau felly sydd wedi creu’r ‘o! be wna i?’ sefyllfa yma.”

Arian a Busnes

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Perthynas gymhleth Cymru a Lerpwl