Jane Dodds yn galw am ail refferendwm Brexit

Diweddarwyd am  
Arweinydd newydd yn gwenu

Jane Dodds

Llun oddi ar wefan Democratiaid Rhyddfrydol Sir Drefaldwyn

Bydd Jane Dodds, arweinydd y Democratiaid Rhyddfrydol yng Nghymru, yn galw o’r newydd heddiw (dydd Sadwrn, Ebrill 6) am ail refferendwm Brexit.

Mae hi’n dweud ei bod hi a’i phlaid yn “ddi-wyro” ynghylch y farn honno, a bod ail refferendwm yn “opsiwn amgen i boblyddiaeth asgell dde, gwleidyddiaeth ofn a Brexit”.

Yn ei haraith yng Nghynhadledd Wanwyn y blaid yng Nghaerdydd, bydd hi’n beirniadu’r rhai sy’n lladd ar Geidwadwyr sydd o blaid aros yn yn Undeb Ewropeaidd, a Jeremy Corbyn am “anwybyddu’r rhan fwyaf o’i aelodau” drwy fethu â gwrthwynebu Brexit.

Ond bydd hi’n canmol Syr Vince Cable, arweinydd y Democratiaid Rhyddfrydol, a’r cyn-arweinydd Tim Farron am gyflwyno’r syniad o gynnal Pleidlais y Bobol.

Araith

“Yn y dair blynedd, bron, ers y refferendwm, rydym wedi gweld Prif Weinidog Ceidwadol sydd wedi rhoi ei phlaid ei hun yn gyntaf bob cam – ac nid ein gwlad,” bydd hi’n dweud wrth y gynhadledd.

“Ei meistri go iawn yw’r ERG a’r DUP.

“Yn y Blaid Geidwadol, plaid a aeth â Phrydain i mewn i Ewrop ac i mewn i’r farchnad sengl, rydym yn gweld aelodau seneddol da, gonest sydd o blaid Ewrop fel Dominic Grieve a Nick Boles yn cael eu labelu’n fradwyr ac yn wynebu pleidleisiau o ddiffyg hyder.

“Yn y cyfamser, mae Jeremy Corbyn yn parhau i anwybyddu’r rhan fwyaf o’i aelodau a phleidleiswyr drwy fethu dro ar ôl tro â gwrthwynebu Brexit a fydd, mae’n amlwg, yn niweidio ein heconomi, ein dyfodol ac yn syml iawn, y mwyaf agored i niwed yn ein cymdeithas.

“Tim Farron oedd wedi dangos cryn ddewrder ar ôl y refferendwm hwnnw a chyflwyno’r syniad o Bleidlais y Bobol.

“Vince Cable aeth â hyn yn ei flaen a rhoi’r Democratiaid Rhyddfrydol wrth galon mudiad o filiynau i roi’r gair olaf ar y cytundeb i’r bobol.

“Gynhadledd, mae yna opsiwn amgen i boblyddiaeth asgell dde, i wleidyddiaeth ofn ac i Brexit.

“Y Democratiaid Rhyddfrydol a rhyddfrydwyr o amgylch y byd yw [yr opsiwn hwnnw].

“Nawr yw ein hamser NI i fynnu gwell, a gwneud safiad.

“Rydym yn mynnu cael Pleidlais y Bobol a byddwn yn ddi-wyro yn ein safiad.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones