Croesawu tîm y Gamp Lawn i’r Senedd

Diweddarwyd  

Senedd, Bae Caerdydd

Llun: nigel-swales-CC-SA-2.0.jpg

Fe fydd tîm rygbi Cymru’n cael eu croesawu i’r Senedd yfory (dydd Llun, Mawrth 17) ar ôl iddyn nhw gipio’r Gamp Lawn ym Mhencampwriaeth y Chwe Gwlad.

Roedden nhw’n fuddugol o 25-7 yn erbyn Iwerddon yn y gêm olaf yng Nghaerdydd ddoe (dydd Sadwrn, Mawrth 16), gan ymestyn eu rhediad di-guro i 14 o gemau.

Yno yn y Senedd i’w croesawu’n swyddogol fydd Ann Jones, Dirprwy Lywydd y Cynulliad, a Mark Drakeford, Prif Weinidog Cymru.

Y Cynulliad a Llywodraeth Cymru sy’n cynnal y derbyniad ar y cyd.

Bydd cyfle i’r cyhoedd weld y garfan a’r tîm hyfforddi ar risiau’r Senedd am 5 o’r gloch.

‘Braint’

“Ein braint ni yw croesawu tîm rygbi llwyddiannus Cymru yn ôl i’r Senedd i gael dathlu a dangos ein gwerthfawrogiad iddyn nhw,” meddai Ann Jones.

“Mae eu llwyddiant yn ysbrydoliaeth i ni gyd ac yn gyfle i ni ymfalchïo yn noniau chwaraeon Cymru.

“Mae Warren Gatland a’i garfan wedi codi ein cenedl unwaith eto ac mae addas ein bod yn diolch iddynt am hynny.”

‘Llwyddiant anhygoel’

“Mae hwn yn lwyddiant arall anhygoel i’r tîm wrth gwrs, gyda chefnogaeth wych cefnogwyr Cymru,” meddai Mark Drakeford.

“Mae’n addas iawn ein bod yn dathlu’r gamp lawn hon gyda’n gilydd ac rwy’n gobeithio y bydd llawer ohonoch yn gallu ymuno â ni yn y dathliadau nos Lun.

“Am ddiweddglo Chwe Gwlad i Warren – teitl arall a’r Gamp Lawn am y trydydd tro sy’n record! Mae Cymru bellach wedi ennill 14 buddugoliaeth ddiguro mewn cyfres – record arall – ac ysbrydoliaeth i’n darpar chwaraewyr ar draws y wlad.

“Rwy’n dymuno’n dda i’r holl garfan am weddill y tymor wrth iddynt ddychwelyd i’w clybiau a’u rhanbarthau ac edrychaf ymlaen at eu gweld yn Siapan yn ddiweddarach eleni yng Nghwpan y Byd.”

‘Hynod ddiolchgar’

“Mae’r garfan a’r tîm rheoli wedi ein gwneud yn genedl falch ac rydym yn hynod ddiolchgar i Gynulliad Cenedlaethol Cymru am nodi’n llwyddiant a galluogi’r cefnogwyr i ymgynnull i ddangos eu cefnogaeth,” meddai Martyn Phillips, prif weithredwr Undeb Rygbi Cymru.

“Mae’n anrhydedd mae carfan 2019 yn ei haeddu, ac yn un bydd yn meddwl y byd i’r chwaraewyr.

“Yn yr un modd, mae cannoedd o unigolion ar draws rygbi Cymru wedi cyfrannu at y llwyddiant hwn a dylai pawb sy’n cymryd rhan yn y gêm ar bob lefel rannu perchnogaeth o’r cyflawniadau, a myfyrio gyda balchder ar ddiwrnod arbennig i’n gem genedlaethol.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones