“Tydi o ddim yn amhosib” y gallai Elfyn Llwyd sefyll etholiad i fod yn Aelod Cynulliad tros etholaeth Dwyfor Meirionnydd, meddai wrth golwg360.
Mi fydd yn cychwyn gweithio i’r Blaid yn y Cynulliad fis nesaf, wrth iddo ddod yn rhan o Gabinet Adam Price.
Bydd cyn-Aelod Seneddol Dwyfor Meirionnydd yn ‘Gwnsler Cyffredinol Cysgodol dros Blaid Cymru’.
Bu’r bargyfreithiwr yn cynrychioli etholaeth Meirionnydd Nant Conwy ac yna Dwyfor Meirionydd yn Senedd San Steffan rhwng 1992 a 2015, ac yn arwain y Blaid yno hefyd.
Ac mae yn dychwelyd i’r byd gwleidyddol – ond yn mynd i’r Cynulliad y tro hwn – i fod yn aelod o Gabinet Cysgodol Plaid Cymru.
Wrth ei waith yn Gwnsler Cyffredinol Cysgodol bydd yn “rhoi cyngor cyfreithiol, fwy na thebyg ar faterion cyfansoddiadol a gweinyddol, ac [yno] i gynghori pan fydda’ yna anghytundeb rhwng Caerdydd a San Steffan,” meddai wrth golwg360.
Herio Dafydd Êl?
Does gan Elfyn Llwyd ddim diddordeb mewn bod yn Aelod Cynulliad ar hyn o bryd.
Ers i Dafydd Elis-Thomas adael y Blaid er mwyn cael bod yn rhan o Lywodraeth Lafur Cymru, bu rhai yn darogan y gallai Elfyn Llwyd sefyll tros Blaid Cymru yn Nwyfor Meirionnydd yn etholiadau’r Cynulliad nesaf.
“Dw i wedi gwneud chwarter canrif o’r gwaith yna yn San Steffan, a dw i ddim yn credu y bydda i â diddordeb yn hynny a dweud y gwir,” meddai Elfyn Llwyd.
Ond “pwy o ŵyr, tydi o ddim yn amhosib” ychwanegodd.
Mi fydd Elfyn Llwyd yn ymddeol o’i swydd yn fargyfreithiwr ymhen mis, cyn dechrau arni eto gyda Phlaid Cymru yn y Cynulliad ym mis Ebrill ble mae’n gobeithio “gallu bod yn bresennol yn eithaf rheolaidd i’r gwahanol gyfarfodydd yn ôl y galw”.
Brolio Adam Price
Mae’r arolwg barn gan BBC Cymru heddiw sy’n darogan y gallai Plaid Cymru gynyddu nifer ei seddi yn y Cynulliad o 10 i 19, wedi “codi calon” Elfyn Llwyd, ac mae’n cadarnhau cryfder yr Arweinydd newydd, meddai.
“Mae’n dangos bod Adam Price a’r tîm wedi gwneud argraff sylweddol iawn dros y chwe mis diwethaf,” meddai.
“Tydi o ddim yn syndod i mi, ond mae hwnna’n gynnydd go sylweddol mewn chwe mis. Mae’n galonogol iawn ac yn dangos bod yr ymagwedd newydd yn dwyn ffrwyth.”
