Cwmni teuluol yn dod i ben wedi hanner canrif

 


Highmead Dairies Llun: Gwefan Highmead Dairies
Wedi dros hanner canrif o ddosbarthu cynnyrch llaeth, bydd un o gwmniau llaeth teuluol mwyaf y gorllewin yn dod i ben ddiwedd yr wythnos hon.

Dydd Gwener fydd y diwrnod olaf o botelu llaeth ar safle Highmead Diaries yn Llanybydder, yn ôl y perchennog Tim Davies, cyn i’r cwmni gael ei drosglwyddo i ddwylo’r prynwyr newydd.

Cwmni o Swydd Gaerloyw, Cotteswold Dairies, sydd wedi prynu’r llaethdy deuluol, ac fe fydd y safle yn cael ei ddefnyddio fel man dosbarthu o hyn ymlaen, gyda’r llaeth yn cael ei botelu mewn ffatri yn Tewkesbury.

Sefyldlwyd Highmead Dairies yn 1957  gan dad Tim Davies – William Davies.

“Dechreuodd y busnes gyda ’nhad yn mynd rownd â’r llaeth o’r ffarm yn ei gart, a phobol yn dod mas i gwrdd ag e â’u jygiau i hôl y llaeth,” meddai Tim Davies wrth Golwg 360.

Ers hynny, mae’r busnes wedi tyfu cryn dipyn, gyda’r cwmni erbyn hyn yn cyflogi 11 o weithwyr ar y safle yn Llanybydder, ac yn derbyn bron i 10,000 litr o laeth bob dydd.

Bydd pedwar gyrrwr o blith yr 11 gweithiwr yn parhau i weithio i’r cwmni newydd yn dosbarthu llaeth, ac fe fydd Tim Davies hefyd yn gweithio gyda’r cwmni newydd ar y safle am gyfnod.

Y farchnad yn newid

Yn ôl Tim Davies, roedd gwerthu’r cwmni teuluol yn ormod o gyfle i’w golli erbyn hyn.

“Does dim llawer o gwmnie fel hyn i gael ar ôl yng Nghymru erbyn hyn i fod yn onest,” meddai. “Ma’ arferion pobol yn newid, ac ma’r archfarchnadoedd yn denu lot o gwsmeried.

“Mae’n galed mas ’na i fusnese nawr.”

Fe ddaeth y cynnig i werthu ar yr amser iawn, yn ôl Tim Davies, oedd eisoes yn gyfarwydd â’r cwmni teuluol o Swydd Gaerloyw sydd wedi ei sefydlu ers 1938, ac yn cyflogi tua 300 o weithwyr.

“Fe alwon nhw mewn un diwrnod, a dweud eu bod nhw yn edrych ar ehangu i mewn i Gymru,” meddai. Mae gan y cwmni eisoes gwsmeriaid yn ardal Llanelli ac ym Mae Colwyn.

Bydd Cotteswold Dairies yn cychwyn ar safle’r hen Highmead Dairies yn Llanybydder ddydd Llun nesaf.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed