Ailagor rheilffordd Aberystwyth i Gaerfyrddin yn “ymarferol”

Diweddarwyd  

Llun: CC0

Fe allai trefi fel Llanbed, Llanybydder a Thregaron gael gwasanaeth rheilffordd unwaith eto wrth i adroddiad ddweud ei bod yn bosib ailagor y lein o Gaerfyrddin i Aberystwyth.

Fe allai’r gwaith o ailagor  yr hen reilffordd yn y Gorllewin gostio £775m, yn ôl yr adroddiad gan gwmni ymgynghorol, Mott MacDonald.

Erbyn hyn, mae’r cwmni wedi dod i’r casgliad bod y cynllun yn un ymarferol, er bod yna rai cyfyngiadau amgylcheddol .

Mae’r adroddiad wedi cael ei groesawu gan grwpiau sydd o blaid y cynllun, gan gynnwys Aelodau Cynulliad a Seneddol lleol.

Cysylltu gogledd a de Cymru

Mae Adrian Kendon, cadeirydd y grŵp ymgyrchu, Traws Link Cymru, yn cydnabod bod cost y prosiect yn “ymddangos yn uchel”.

Ond dywed bod prosiectau ffyrdd eraill, fel datblygu ffordd osgoi’r M4 o gwmpas Casnewydd, yn mynd i gostio “llawer mwy”.

“Hir yw pob aros, ond rydym wrth ein bodd gyda’r adroddiad,” meddai. “Mae’n amlwg yn dangos nad yw’r prosiect hwn yn freuddwyd gwrach ac mae popeth nawr yn dibynnu ar ewyllys gwleidyddol Llywodraethau Cymru a’r Deyrnas Unedig.”

“Rydym yn credu’n gryf fod y prosiect hwn yn fwy gwerth chweil [na’r prosiectau ffyrdd eraill], gan y byddai’n cysylltu gogledd a de’r wlad, yn adfywio cymunedau ac yn hybu economi gorllewin Cymru.”

“Syniad llawn dychymyg”

Mewn datganiad ar y cyd, mae’r adroddiad wedi cael croeso brwd gan wleidyddion Plaid Cymru o fewn yr ardal.

“Mae hwn yn syniad llawn dychymyg a chyffrous a fydd, dw i’n siŵr, yn ysbrydoli pobol Cymru ac yn newid siâp ein cenedl,” meddai Adam Price, Arweinydd Plaid Cymru ac Aelod Cynulliad dros Ddwyrain Caerfyrddin a Dinefwr.

“Os yw Llywodraeth Cymru o ddifrif ynglŷn â datblygu pob rhan o Gymru, yna dyma eu cyfle i brofi hynny.”

Cyfrannodd Llywodraeth Cymru hyd at £300,000 ar gyfer yr astudiaeth, er mai’r amcangyfrif ar y pryd oedd y byddai’r cynllun yn costio rhwng £600m a £750m.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Anrhydeddau Gorsedd y Beirdd 2019