Gwasanaeth trenau dwyieithog “cyn gynted â phosib” – Carwyn Jones

Diweddarwyd am  
Un o drenau cwmni Keolis-Amey

Un o drenau cwmni Keolis-Amey

Llun: Llywodraeth Cymru

Mae Prif Weinidog Cymru, Carwyn Jones, yn dweud ei fod am sicrhau bod holl wasanaethau trenau Cymru yn ddwyieithog “cyn gynted â phosib”.

Daw hyn yn dilyn adroddiadau bod yna broblemau gyda darpariaeth Gymraeg y gwasanaeth trenau newydd, sef Trafnidiaeth Cymru, sy’n cael ei lansio heddiw (dydd Llun, Hydref 15).

Mae’n debyg nad yw ap Cymraeg y gwasanaeth yn gweithio ac nad oes modd prynu tocynnau ar-lein trwy gyfrwng y Gymraeg.

“O’n i ddim yn gwybod ʾna, ond fe wnaf yn siŵr bod hynny’n newid cyn gynted â phosib,” meddai Carwyn Jones ar BBC Radio Cymru y bore yma.

“Mae’n hollbwysig, wrth gwrs, bod gyda ni wasanaeth dwyieithog, ac i glywed bod yr ap Cymraeg ddim ar gael ar hyn o bryd, wel mae hwnna’n gorfod cael ei ddatrys yn glou.”

“Siomedig”

Mewn llythyr at Trafnidiaeth Cymru, mae Aled Thomas, aelod o Gymdeithas yr Iaith, yn beirniadu’r cwmni am y diffyg Cymraeg, gan ddweud ei fod yn “siomedig” nad yw’r ap Cymraeg yn gweithio.

“Er fy mod i’n croesawu’r ffaith bod y gwasanaeth drenau newydd yma wedi lansio, nid yw’n argoeli’n dda nad oes sylw at y Gymraeg yn eich cynnyrch newydd,” meddai.

“Yn fy marn i, dylech chi fod yn rhoi’r un sylw tuag at y Gymraeg.”

‘Gwasanaeth trenau gorau’r Deyrnas Unedig’

Mae Trafnidiaeth Cymru, sy’n cael ei redeg mewn partneriaeth rhwng Llywodraeth Cymru a’r cwmni KeolisAmey, yn cael ei lansio yng ngorsaf drenau Pontypridd heddiw.

Daeth Trenau Arriva Cymru, sydd wedi bod yn gyfrifol am y gwasanaeth trenau yng Nghymru ers 2003, i ben dros y penwythnos.

Mae Llywodraeth Cymru yn gobeithio y bydd Trafnidiaeth Cymru yn sicrhau bod gan Gymru y “gwasanaeth rheilffyrdd gorau yn y Deyrnas Unedig erbyn 2033”.

“Mae hwn yn ddiwrnod pwysig i reilffyrdd yng Nghymru – yn wir ar gyfer datganoli,” meddai Carwyn Jones yn ystod y lansiad.

“Mae’r cyfle i ddatblygu system drafnidiaeth integredig sy’n annog twf economaidd ac sy’n cefnogi ein gwasanaethau cyhoeddus yn well ar draws pob plaid wleidyddol, a’r cyfle i ddatblygu systemau Metro yma yn ne-ddwyrain Cymru, yn y gogledd-ddwyrain a ger Bae Abertawe, yn tynnu sylw ledled y byd.”

Cynlluniau’r dyfodol

Mae Llywodraeth Cymru yn gobeithio buddsoddi £5bn yn Trafnidiaeth Cymru dros y 15 mlynedd nesaf, gyda’r arian hwnnw yn cael ei ddefnyddio ar gyfer cynlluniau sy’n cynnwys:

  • Buddsoddi £800m mewn trenau newydd, gan olygu y bydd 95% o deithwyr erbyn 2023 yn teithio ar drenau newydd sbon;
  • Buddsoddi £194m mewn gwella profiadau teithwyr mewn gorsafoedd ledled Cymru a’r Gororau;
  • Buddsoddi £738m mewn moderneiddio’r rheilffyrdd metro canolog;
  • Creu 600 o swydd a 450 o brentisiaethau newydd;
  • Cynnig tocynnau am ddim i blant dan 11 oed a thocynnau hanner pris i bobol ifanc rhwng 16 ac 18 oed.

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed