Ffrae iaith addysg Conwy: cyhuddo’r Cyngor o “gelu gwybodaeth”

Diweddarwyd  
Disgybl yn ysgrifennu mewn llyfr nodiadau

Wrth i ffrae ddwysáu yng Nghonwy tros hysbyseb swydd cyfarwyddwr addysg, mae ymgyrchwyr iaith wedi cyhuddo’r Cyngor o “gelu gwybodaeth a ddylsai fod yn gyhoeddus”.

Daeth Cyngor Conwy dan y lach ym mis Awst wedi iddo ddod i’r amlwg bod medru’r Gymraeg yn ‘ddymunol’ ar gyfer swydd Pennaeth Addysg Dros Dro.

Dyma oedd yr ail dro i’r awdurdod lleol wahodd ceisiadau am y swydd, ac er bod y Gymraeg yn ‘hanfodol’ yn eu hysbyseb cyntaf, fe benderfynodd y Cyngor newid gofynion y swydd.

Yn ôl y Cyngor, doedd dim un ymgeisydd wedi “bodloni’r meini prawf Cymraeg” yn ystod y rownd gyntaf o geisiadau.

“Diffyg tryloywder”

Mae grŵp Cylch yr Iaith wedi codi pryderon am “ddiffyg tryloywder” gan Gyngor Conwy ynghylch y modd y daethpwyd i’r penderfyniad i newid geiriad yr hysbyseb.  

Dyw cofnodion y cyfarfod lle ddaeth y Cyngor i’w penderfyniad heb gael eu cyhoeddi, meddai’r ymgyrchwyr sydd bellach yn bwriadu anfon cais Rhyddid Gwybodaeth i’w datgelu.

Mae Cyngor Conwy wedi dewis peidio ä datgelu’r cofnodion gan eu bod yn ymdrin â gwybodaeth bersonol a phreifat am unigolion, yn ôl Cylch yr Iaith.

“Ddim yn ddilys”

“Dydi’r rheswm y mae’r cyngor yn ei roi ddim yn ddilys oherwydd doedd gan yr Uwch-Bwyllgor Cyflogaeth ddim awdurdod i drafod unigolion,” meddai Geraint Jones ar ran Cylch yr Iaith.

“Yr hyn oedd yn cael ei drafod oedd y swydd-ddisgrifiad a gwerth y Gymraeg fel cymhwyster.

“Mae’n ymddangos bod y cyngor eisiau celu’r drafodaeth ar y Gymraeg oddi wrth y cyhoedd, ac mae hyn yn gwbwl annerbyniol.”

Y swydd

Mae’r swydd yn cynnig cyflog rhwng £69,078 a 76,098, a Medi 7 oedd dyddiad cau ar gyfer derbyn ceisiadau. Bydd y cyfweliadau’n cael eu cynnal ar Fedi 28.

Bydd dirprwyaeth o Gylch yr Iaith yn cyfarfod â chynghorwyr Conwy ddydd Gwener yr wythnos hon (Medi 14).

Addysg

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed