Ysgol Gymraeg newydd i Bort Talbot

Diweddarwyd  
Ysgol Gymraeg Bro Dur

Ysgol Gymraeg Bro Dur

Llun gan Ysgol Gymraeg Bro Dur

Mae ysgol uwchradd Gymraeg  wedi derbyn ei disgyblion cyntaf ym Mhort Talbot yr wythnos hon.

Agorodd Ysgol Gymraeg Bro Dur ei drysau i 230 o ddisgyblion blwyddyn saith ag wyth yn ardal Traeth Melyn (Sandfields) ym Mhort Talbot.

Daeth y disgyblion o Ysgol Uwchradd Gymraeg Ystalyfera a thair ysgol gynradd leol, Ysgol Gynradd Gymraeg Rhosafan, Tyle’r Ynn a Chastell-nedd.

Cyfleusterau i’r gymuned

Mae’r campws newydd sbon gwerth £18 miliwn yn cynnwys cyfleusterau a meysydd chwaraeon a all fod o fudd i’r gymuned ehangach.

Llywodraeth Cymru a Chyngor Castell-nedd Port Talbot sydd wedi ariannu’r ysgol newydd, sydd wedi ei chodi er mwyn sicrhau bod  “disgyblion hynny sydd am flynyddoedd wedi gorfod wynebu taith hir i gael mynediad i addysg cyfrwng Cymraeg yn Ysgol Gymraeg Ystalyfera, bellach yn gallu parhau â’u hastudiaethau yn eu cymuned leol”.

Mae’r ysgol newydd yn parhau yn rhan o Ysgol Gymraeg Ystalyfera, ac mae’r Prifathro, Matthew Evans wrth ei fodd gydag agoriad y cyfleuster ardderchog hwn yn ne sir Castell Nedd Port Talbot.

“Rydym yn hynod o falch bod Ystalyfera yn gallu ymestyn ei darpariaeth ar gyfer plant a phobl ifanc lleol o fewn eu cymunedau eu hunain.

“Mae Bro Dur yn fuddsoddiad aruthrol sy’n gweld buddiannau addysg Gymraeg yn cael eu hymestyn o fewn Castell-nedd Port Talbot ac rydym yn edrych ymlaen yn eiddgar at ddatblygu partneriaethau newydd yn y dyfodol agos.

“Dyna pam fod yr ysgol yn cynnal digwyddiad drysau agored ym Mro Dur ddydd Mawrth nesaf, 11ain o Fedi o 3.30 – 6.30pm, er mwyn dechrau’r perthnasau holl bwysig hyn “.

Y disgyblion ar ben eu digon

Lilly Emanuel, 12 oed ac o Faglan: “Roedd y daith i Ystalyfera ar y bws yn cymryd amser hir, ond erbyn hyn rwyf yn yr ysgol mewn deng munud!  Mae’n newid mor fawr ac rwy’n edrych ymlaen at y dyfodol ym Mro Dur ”

Darcie Hewitt, 11 oed ac o Sgiwen: “Dw i mor gyffrous i fod yn yr ysgol newydd sbon hon.  Roedd bod yn rhan o raglen Llysgenhadon Adeiladu Bro Dur yn gyfle gwych i weld y broses adeiladu gyfan o’r dechrau i’r diwedd.”

Iona Walker Hunt, 11oed ac o Aberafan: “Cyn i mi ddechrau roeddwn ychydig yn nerfus, oherwydd roedd yn golygu pobl newydd, ysgol newydd a chymuned newydd.  Ond yn gyflym iawn rydw i wedi teimlo gartrefol ac wedi cael fy nghroesau i Fro dur “.

 ‘Pennod newydd’

“Mae hwn yn ddechrau pennod newydd sbon yn hanes addysg cyfrwng Cymraeg yng Nghastell-nedd Port Talbot,” meddai’r Cynghorydd Alun Llewelyn, Cadeirydd y Corff Llywodraethu.

“Y flwyddyn academaidd hon byddwn yn dathlu agoriad Ysgol Gyfun Ystalyfera yn 1969 gyda dim ond 330 o ddisgyblion.

“Mae’r ffaith ein bod yn agor Ysgol Gymraeg Bro Dur eleni yn parhau â thraddodiad gwych Ystalyfera i genhedlaeth newydd o blant a phobl ifanc yr ardal hon.  Dymunaf bob llwyddiant posibl iddynt.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed