Fe fydd teuluoedd yng Nghymru a gweddill gwledydd Prydain yn talu mwy na £7 y mis yn fwy am fwyd yn ystod y cyfnod nesa’ – oherwydd y tywydd eithafol eleni.
Dyna gasgliad gwaith ymchwil gan gorff arbenigol sy’n dweud bod prisiau bwyd mewn siopau wedi codi o 1.9% ym mis Awst.
Mae hynny’n golygu bod cyfanswm prisiau nwyddau mewn siopau wedi codi’n gyffredinol am y tro cynta’ ers pum mlynedd.
A rhybudd Canolfan Ymchwil Economeg a Busnes yw y bydd prisiau bwyd yn parhau 5% yn uwch yn ystod gweddill y flwyddyn.
Effaith tywydd eithafol
Y rheswm, meddai’r Ganolfan, yw’r tywydd – y cyfnod hir o rew ynghynt ac wedyn yr haf crasboeth, a hynny’n arwain at lai o dyfiant a phrinder porfa.
O ganlyniad, roedd prisiau rhai llysiau wedi codi’n sylweddol rhwng mis Mawrth a Gorffennaf eleni:
Moron – 80%
Letys – 61%
Nionod/winwns – 41%
Gwenith bara – 20%
Effaith tros gyfnod
Yn ôl yr adroddiad, roedd lefelau cynnyrch y diwydiant llaeth wedi gostwng bob wythnos am 11 wythnos oherwydd diffyg tyfiant a phorfa.
Roedd hynny’n golygu bod pris menyn wedi codi 24% ers mis Mawrth.
Fe fydd pris peth gwin yn codi oherwydd effaith cesair neu genllysg ar winllannoedd Ffrainc ond fe ddylai pris cig coch ostwng ychydig wrth i ffermwyr werthu’n gynnar er mwyn ysgafnhau’r pwysau ar borfa.
