Datganoli darlledu: erlyn tri am wrthod talu eu ffi drwydded

 

Llun: CC0 trwy www.pixabay.com

Daeth cadarnhad y bydd tri ymgyrchydd iaith yn cael eu herlyn am wrthod talu eu ffri drwydded deledu.

Mae Williams Griffiths o Fodorgan ym Môn, Ffred Ffransis o Lanfihangel-ar-Arth yn Sir Gaerfyrddin, a Heledd Gwyndaf o Dalgarreg yng Ngheredigion wedi gweithredu wrth alw am ddatganoli darlledu i Gymru.

Daw’r cadarnhad ar y diwrnod pan fydd mater darlledu yng Nghymru’n cael sylw mewn sgwrs ym Mhabell y Cymdeithasau 2 ar Faes yr Eisteddfod ym Mae Caerdydd. Yn cymryd rhan yn y digwyddiad am 3 o’r gloch mae Euryn Ogwen Williams, yr Ysgrifennydd Cabinet Alun Davies ac Angharad Mair.

Yr ymgyrch

Williams Griffiths, Ffred Ffransis a Heledd Gwyndaf yw’r bobol gyntaf gerbron llys ers i Gymdeithas yr Iaith Gymraeg ddechrau annog pobol i wrthod talu eu ffi drwydded deledu y llynedd.

Yn ôl y Gymdeithas, mae mwy na 70 o bobol wedi gwrthod talu’r ffi ar hyn o bryd.

Wrth aros am ddyddiad ar gyfer ei gwrandawiad, dywedodd Cadeirydd Cymdeithas yr Iaith, Heledd Gwyndaf ei bod yn “ddiolchgar” i bawb sydd wedi ymuno â’r ymgyrch.

“O ddiffyg presenoldeb y Gymraeg ar radio masnachol a theledu lleol, i’r toriadau difrifol i S4C, i’r diffyg cynnwys Cymreig yn y cyfryngau, mae’n glir nad yw Llundain yn rheoli’r cyfryngau er budd pobol Cymru.”

‘Diffyg democrataidd’

“Mae hi hefyd yn amlwg bod gan Gymru ddiffyg democrataidd mawr,” meddai wedyn. “Mae’r darlledwyr Prydeinig yn drysu pobol drwy adrodd ar yr holl benderfyniadau sy’n effeithio ar Loegr yn unig fel petai’n berthnasol i ni.

“Mae angen i’r penderfyniadau dros y cyfryngau yng Nghymru gael eu gwneud gan bobol Cymru. Mae’n bryd datganoli darlledu.

“Nawr yw’r amser i sicrhau ein bod ni yng Nghymru yn rheoli ein cyfryngau er lles yr iaith a holl gymunedau Cymru. Ac mae’r cyhoedd gyda ni: yn ôl arolygon barn, mae mwyafrif clir o bobol Cymru o blaid datganoli maes darlledu yn ei gyfanrwydd i Gymru.

“Byddai datganoli darlledu felly yn hwb enfawr i ddarlledu a democratiaeth Cymru, gyda llawer mwy o arian yn cael ei wario ar raglenni am Gymru, o Gymru ac yng Nghymru nag sydd heddiw.

“Yn ogystal â hynny, byddai’r holl raglenni darlledu cyhoeddus yn cael eu cynhyrchu o safbwyntiau Cymru felly byddent yn adlewyrchu dyheadau pobol Cymru.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed