“Byddin o deulu a ffrindiau” yn cerdded mewn cefnogaeth

Diweddarwyd am  

Steffan Lewis a’i chwaer, Nia Davies

Llun oddi ar dudalen www.justgiving.com Taith Steffan Lewis

Mae lefel y gefnogaeth i ddigwyddiad ‘Taith Steffan Lewis’ wedi bod yn “anhygoel”, yn ôl un o’r trefnwyr.

Yfory (dydd Sadwrn, Gorffennaf 14), fe fydd ffrindiau a theulu’r Aelod Cynulliad Plaid Cymru Steffan Lewis, yn ymlwybro trwy’r Cymoedd er mwyn codi arian tuag at ganolfan ganser.

Yn ôl Rhuanedd Richards, un o drefnwyr y digwyddiad, mae pobol “o Gymru gyfan” – nyrsys, aelodau’r heddlu, pobol â chanser – wedi cysylltu â hi er mwyn bod yn rhan o’r daith.

Ac mae’n nodi bod haeldioni y bobol yma wedi bod yn “sioc”.

“Maen nhw wedi bod mor gefnogol reit o’r cychwyn cynta’,” meddai Rhuanedd Richards wrth golwg360.

“Gwnaethon ni rhoi’r hysbyseb yn gyntaf i Aelodau Cynulliad gan feddwl y byddai ambell un yn ymuno.

“Ond mae’n anhygoel faint o bobol wnaeth gysylltu yn syth bin, a dweud ‘plîs rhowch ein henwau i lawr’ – o bob un blaid. Mae Aelodau Seneddol yn dod hefyd.

“Dw i ffaelu credu faint o gefnogaeth r’yn ni wedi cael.”

“Byddin o deulu a ffrindiau”

Chwaer fach yr Aelod Cynulliad, Nia Davies, 17, a ddaeth at Rhuanedd Richards gyda’r syniad o gynnal digwyddiad i godi arian.

Ac mae’r trefnydd yn canmol y ferch, a’r “fyddin o deulu a ffrindiau”, am ddangos cymaint o gefnogaeth a brwdfrydedd.

“Mae [Nia], ei mam, a’u teulu i gyd wedi bod trwy gyfnod mor mor anodd, dros yr wyth i naw mis diwetha’ ers i Steffan gael y diagnosis.

“Ac wrth gwrs, mae Nia yn ifanc iawn ei hun, a’n gorfod wynebu’r holl heriau mae rhywun sy’n 17 oed yn gorfod wynebu – arholiadau ysgol, penderfyniadau coleg,  ac yn y blaen.

“Ond, trwy’r cyfan, mae hi wedi rhoi ei brawd yn gyntaf.”

“Emosiynol”

Bydd y cerddwyr yn ymlwybro am ddeg milltir rhwng Cwmcarn a’r Coed Duon – i’r gogledd o Gaerffili – ac mi fydd rhyw 170 o bobol yn cymryd rhan.

Mae Rhuanedd Richards yn cydnabod bydd y daith yn “heriol” yn gorfforol, a’n “emosiynol”; a’n nodi ei bod yn edrych ymlaen at y parti a fydd yn cael ei gynnal ar y diwedd.

Er nad oes disgwyl i Steffan Lewis gymryd rhan, mae’n debygol y bydd ef yn cyfarch y cerddwyr cyn iddyn nhw ddechrau ar y daith.   

Gallwch weld fideo o Rhuanedd Richards yn siarad am y digwyddiad isod…

https://www.youtube.com/watch?v=53erA7cMtNQ&feature=youtu.be

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed