Gŵyl ‘dim nawdd cyhoeddus’ yn gwerthu allan

Diweddarwyd  
Bydd Ceri Cunnington yn perfformio gydag Anweledig a Twmffat yng Ngŵyl Car Gwyllt

Bydd Ceri Cunnington yn perfformio gydag Anweledig a Twmffat yng Ngŵyl Car Gwyllt

Llun oddi ar ei broffil www.discogs.com

Mae’r ffaith bod yr holl docynnau ar gyfer gŵyl gerddorol ym Mlaenau Ffestiniog wedi eu gwerthu, yn brawf o bwysigrwydd yr ardal i ddyfodol yr iaith Gymraeg.

Dyna farn Ceri Cunnington, un o drefnwyr Gŵyl Car Gwyllt, sydd hefyd am bwysleisio bod y gig yn digwydd heb geiniog o nawdd cyhoeddus.

Bydd yr ŵyl yn cael ei chynnal mewn marcî ar gae rygbi Blaenau Ffestiniog ar ddydd Sadwrn, Gorffennaf 14, rhwng dau y p’nawn a hanner nos.

Mae Anweledig wedi ailffurfio yn unswydd i berfformio, y tro cyntaf iddyn nhw fod ar lwyfan ers 11 mlynedd.

Bydd 12 o fandiau Cymraeg eraill yn chwarae yn ystod y dydd, a’r bwriad yw rhannu’r elw ymysg mentrau cymunedol lleol.

Cadw’r costau lawr

Mae’r trefnwyr wedi llwyddo i gadw’r costau lawr oherwydd haelioni grwpiau lleol, meddai Ceri Cunnington.

Cafodd y marcî ei roi i’w ddefnyddio am ddim gan gwmni Seren Ffestiniog Cyf, sy’n cefnogi oedolion gydag anableddau dysgu yn yr ardal.

Ac mae aelodau’r clwb rygbi wedi gwirfoddoli i redeg y bar a chadw golwg ar ddiogelwch ar y safle.

“Mae o’n dangos balchder mewn bro,” meddai Ceri Cunnington.

“Mae o’n dangos bod fama yn bwysig o ran dyfodol yr iaith, dyfodol diwylliant Cymraeg.

“Ac mae o’n tueddu i gael ei anwybyddu, achos mae pobol yn cymryd [yr ardal] yn ganiataol.

“Yn economaidd, mae o’n dlawd. Ond yn ddiwylliannol, mae o’n uffernol o gryf.

“A dw i’n meddwl bod ni eisiau codi ymwybyddiaeth Llywodraeth Cymru a Chyngor Gwynedd.

“Os ydyn nhw eisiau gweld yr iaith a diwylliant Cymraeg yn ffynnu, a’r miliwn o siaradwyr Cymraeg yma, mae eisiau iddyn nhw fuddsoddi mewn llefydd fel Blaenau hefyd.

“Mae fama cyn bwysiced ag unrhyw Dafwyl – a dim lladd ar Tafwyl ydw i. Ond trio gwneud Llywodraeth Cymru yn ymwybodol o le mae angen y buddsoddiad.”

Galw am gefnogaeth

Gyda chysgod tros ddyfodol clwb ieuenctid Blaenau Ffestiniog, oherwydd toriadau ariannol, mae Ceri Cunnington yn dweud bod angen “aildanio pethau”.

“Mae yn rhaid i ni wneud pethau tros ein hunain, fel rydan ni yn trio ei wneud yn Blaenau.

“Ond hefyd, mae yn rhaid i ni gael cefnogaeth asiantaethau a sefydliadau fel Llywodraeth Cymru a Chyngor Gwynedd…

“Ond dim chwarae’r victim ydw i, ond dweud: ‘Dowch i ni afael ynddi hi a mynd amdani go-iawn’.

“A dathliad fydd y gig yma. Fydd o ddim yn rant gwleidyddol! Parti fydd o!

“Mae o’n mynd i fod yn hwyl ac yn ddathliad. A dyna’r ffordd rydan ni yn mynd i oroesi – mynd amdani, peidio bod yn victims.”

Mwy am aduniad Anweledig yng nghylchgrawn Golwg

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Anrhydeddau Gorsedd y Beirdd 2019