Cyhuddo Eluned Morgan o “gamarwain y Senedd”

Diweddarwyd am  
Eluned Morgan

Eluned Morgan

Llun: Cynulliad Cenedlaethol Cymru CC 2.0

Mae ymgyrchwyr iaith wedi cyhuddo Gweinidog y Gymraeg o “gamarwain y Senedd”, ac maen nhw wedi cyflwyno cwyn swyddogol yn ei herbyn.

Honiad Cymdeithas yr Iaith yw bod Eluned Morgan wedi cyhoeddi ffigyrau “anghywir” am yr ymgynghoriad ar Fil y Gymraeg – diwygiad arfaethedig i Fesur y Gymraeg.

Mewn datganiad ysgrifenedig ym mis Ionawr, mi ddywedodd y gweinidog: “cefnogwyd ein cynigion [ar gyfer Bil y Gymraeg] gan y sawl a ymatebodd i’r ymgynghoriad”.

Ond, mae’r mudiad iaith wedi herio hyn, gan nodi mai dim ond 77 o’r 504 o ymatebion oedd yn cefnogi eu cynnig i ddiddymu Comisiynydd y Gymraeg – un o gynigion y Bil.

Yn ogystal, mae’r ymgyrchwyr yn honni bod y gwasanaeth sifil wedi cyfaddef bod “sail i’w cwyn” – hynny yw, bod y Llywodraeth heb grynhoi’r ymatebion i’r ymgynghoriad yn iawn.

Bellach, mae’r mudiad wedi gwneud cwyn swyddogol wrth yr Ombwdsmon Gwasanaethau Cyhoeddus a’r Prif Weinidog, gan gyhuddo Eluned Morgan o “amharchu’r broses ymgynghori”.

“Deddf iaith wannach”

“Mae’r hyn mae’r Gweinidog wedi’i ddweud yn ei datganiad yn camarwain y Senedd,” meddai Heledd Gwyndaf, Cadeirydd Cymdeithas yr Iaith. “Ac er eu bod yn derbyn bod y datganiad yn un ffals, maen nhw’n gwrthod ei gywiro.”

“Mae’n trin y broses ymgynghori gyda dirmyg llwyr. Mae’r Llywodraeth wedi camarwain a chamweinyddu. Maen nhw’n ceisio cuddio’r ffaith nad yw pobl Cymru eisiau’r ddeddf iaith wannach mae’r Llywodraeth yn ceisio’i gwthio drwodd.”

Ymateb Llywodraeth Cymru 

“Rydyn ni wedi ymchwilio’n llawn i gŵyn Cymdeithas yr Iaith ac rydyn ni’n gwneud newidiadau i’n canllawiau ar sut i adrodd ar ymatebion grwpiau ymgyrchu i ymgynghoriadau,” meddai llefarydd.

“Nid yw hyn yn newid ein safbwynt y dylid gwahaniaethu rhwng ymatebion ymgyrchu ac ymatebion unigol manwl i ymgynghoriadau.

“Mae rhai grwpiau ymgyrchu’n gwrthwynebu ein cynigion, ac rydym yn gwerthfawrogi eu barn. Fodd bynnag, ac eithrio’r grwpiau hynny, roedd cefnogaeth i’n cynigion ymhlith yr ymatebwyr eraill.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Tywysogion Cymru – pa rai sy’n werth eu cofio?