“Amheuon difrifol” am gynllun gofal £125m

 

Nick Ramsay

Llun: Cynulliad Cenedlaethol Cymru CC 2.0

Mae un o bwyllgorau’r Cynulliad yn dweud bod ganddyn nhw “amheuon difrifol” am gynllun newydd ar gyfer rhaglen sy’n rhoi cymorth i’r bobol fwyaf bregus mewn cymdeithas yng Nghymru.

Mae Rhaglen Cefnogi Pobl, sydd werth tua £125m, wedi bodoli ers 14 mlynedd, a’i nod yw helpu pobol ddigartref a phobol sy’n agored i niwed i fyw mor annibynnol â phosibl.

Mae hefyd yn rhoi cymorth iddyn nhw cyn gynted ag y bo modd, a hynny er mwyn lleihau’r galw ar wasanaethau cyhoeddus, megis y gwasanaethau iechyd a chymdeithasol.

Yn ôl Llywodraeth Cymru, mae tua 57,000 o bobol yn elwa o’r rhaglen bob blwyddyn, gyda 37,000 o’r rheiny’n bobol hŷn.

Problemau’r rhaglen

 Ond mae’r Pwyllgor Cyfrifon Cyhoeddus yn y Cynulliad yn dweud bod bwriad Llywodraeth Cymru i gyfuno’r rhaglen â chynlluniau eraill i greu ‘Grant Ymyrraeth Gynnar, Atal Problemau a Chefnogaeth’ yn ddirgelwch iddyn nhw.

Wrth ystyried bod yna brinder gwybodaeth am y cynllun grant newydd, a’r ffordd y mae’n cael ei ariannu, mae’r pwyllgor yn teimlo bod pethau’n cael eu “celu” oddi wrthyn nhw.

Maen nhw hefyd yn dweud nad oedden nhw’n gallu darganfod pa mor llwyddiannus y mae’r Rhaglen Cefnogi Pobl wedi bod dros y blynyddoedd, na’r hyn y mae Llywodraeth Cymru wedi’i ddysgu ohoni er mwyn gwneud gwelliannau.

“Diffygion mawr”

 Yn ôl cadeirydd y pwyllgor, mae yna “ddiffygion mawr” yn parhau gyda’r ffordd y mae Rhaglen Cefnogi Pobl yn cael ei reoli.

“Roedd y cynnydd wrth fynd i’r afael â materion a godwyd gan adolygiadau blaenorol, er enghraifft, mewn perthynas â’r fformiwla ariannu a monitro effaith y Rhaglen, wedi bod yn araf,” meddai’r Aelod Cynulliad, Nick Ramsay.

“Er ein bod yn cydnabod y gallai fod lle i integreiddio rhaglenni grant yn well er mwyn sicrhau gwell canlyniadau, mae gennym amheuon difrifol am y ffordd y datblygwyd ac y cyhoeddwyd y cynigion ar gyfer y grant integredig newydd ym manylion cynigion cyllideb Llywodraeth Cymru.

“Mae angen i Lywodraeth Cymru wneud mwy i ddangos y sail dystiolaeth ar gyfer ei gynigion a phrofi’r trefniadau drwy werthusiad cadarn o brosiectau peilot ariannu hyblyg sydd bellach ar y gweill, cyn penderfynu ar gwmpas unrhyw grant newydd a’r amserlen ar gyfer ei weithredu.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed