Ffordd osgoi Caernarfon a’r Bontnewydd: protest oherwydd oedi

Diweddarwyd  
Protestwyr yn y Bontnewydd heddiw (dydd Llun, Ebrill 30)

Protestwyr yn y Bontnewydd oherwydd oedi cyn dechrau gwaith ar ffordd osgoi (dydd Llun, Ebrill 30)

Llun trwy law swyddfa Siân Gwenllian

Mae protest wedi’i chynnal yng Ngwynedd heddiw ynglŷn â’r oedi cyn cychwyn y gwaith adeiladu ar ffordd osgoi rhwng Caernarfon a’r Bontnewydd.

Roedd disgwyl i’r gwaith ar y ffordd chwe milltir gychwyn yn 2016, a’i gwblhau erbyn eleni, ond yn dilyn ymgynghoriad cyhoeddus a gafodd ei gynnal fis Mehefin y llynedd, mae disgwyl o hyd i Lywodraeth Cymru benderfynu pryd fydd y gwaith yn cychwyn.

Ac er ei bod nhw wedi addo y bydd penderfyniad yn cael ei wneud erbyn “y Gwanwyn” eleni, mae trigolion lleol wedi mynegi eu rhwystredigaeth ynglŷn â’r oedi, gyda thua 40 o bobol yn bresennol mewn protest yn y Bontnewydd heddiw (dydd Llun, Ebrill 30).

“Rhwystredigaeth gyhoeddus”

Yn ôl yr Aelod Cynulliad lleol, Siân Gwenllian a’r Aelod Seneddol Hywel Williams, mae yna “rhwystredigaeth gyhoeddus” yn yr ardal am y “diffyg cynnydd a’r diffyg eglurder” o du Llywodraeth Cymru.

“Mae pobl yn dod i fyny atom bron bob tro yr ydym ni allan yng Nghaernarfon a’r pentrefi cyfagos, yn holi beth ar wyneb y ddaear sy’n dal yn ôl y ffordd osgoi a pham nad oes unrhyw ddatblygiad,” meddai’r ddau.

“Mae pobol yn rhwystredig iawn gyda’r oedi parhaus i’r cynllun. Roedd y gwaith i fod i ddechrau yn 2016 ac roedd y ffordd i fod yn barod eleni.

“Mae tagfeydd swnllyd a budr yn yr ardal yn dal yn broblem enfawr i bobl leol yn ddyddiol. Pam fod y Gweinidog yn oedi?”

Ymateb Llywodraeth Cymru

Yn ôl llefarydd ar ran Llywodraeth Cymru: “Rydym ni’n deall bod trigolion eisiau penderfyniad ar ffordd osgoi Caernarfon/Bontnewydd, ond mae’n hanfodol ac yn hollol gywir bod ystyriaeth lawn yn cael ei rhoi i’r holl dystiolaeth ynglŷn â’r hyn sy’n gynllun enfawr.

“Rydym ni’n ystyried yn fanwl y casgliadau a’r argymhellion sydd wedi’u cynnig gan adroddiad yr archwilydd, a’r nifer uchel o ohebiaeth o blaid ac yn erbyn y cynllun, fel rhan o’r broses gyfreithiol.

“Mae’n bwysig bod hyn i gyd yn cael eu hystyried, ac mae Ysgrifennydd y Cabinet wedi ymrwymo i wneud penderfyniad yn y Gwanwyn.”

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed