Beirnaidu Paul Flynn am gysylltu’r Blaid Geidwadol ag ymosodiad Salisbury

Diweddarwyd  
Y gwleidydd wrth ei ddesg, a silffoedd llyfrau y tu cefn iddo

Paul Flynn

Llun oddi ar wefan www.paulflynnmp.co.uk

Mae Aelod Seneddol yng Nghymru o dan y lach ar ôl iddo wneud sylwadau ar y cyfryngau cymdeithasol yn cysylltu’r Blaid Geidwadol â’r ymosodiad ar gyn-ysbïwr yn Salisbury (Caersallog).

Ar y wefan gymdeithasol, Twitter, fe gyhuddodd Paul Flynn, Aelod Seneddol Llafur dros Orllewin Casnewydd, y Ceidwadwyr o gael eu hariannu gan y rheiny a oedd yn gyfrifol am yr ymosodiad ar gyn-ysbïwr o Rwsia a’i ferch dros wythnos yn ôl.

“Y Blaid Geidwadol – yn cael eu noddi’n swyddogol gan laddwyr y nwy nerfol,” meddai Paul Flynn yn ei sylw.

Cyhuddo Rwsia

Fe wnaeth ei sylw ddiwrnod ar ôl i’r Prif Weinidog, Theresa May, ddatgan i aelodau’r Senedd yn San Steffan ei bod yn “debygol iawn” mai Rwsia oedd yn gyfrifol am yr ymosodiad yn Salisbury, gan adael cyn-ysbïwr o’r wlad, sef Sergei Skrpal, a’i ferch, Yulia, mewn cyflwr difrifol yn yr ysbyty.

Cyhoeddodd hefyd mai math o nwy nerfol sy’n cael ei ddatblygu gan fyddin Rwsia, ac sy’n aelod o’r teulu novichok, a gafodd ei ddefnyddio yn yr ymosodiad.

Yn dilyn y cyhoeddiad, fe ymatebodd arweinydd y Blaid Lafur, Jeremy Corbyn, drwy honni bod gwerth dros £800,000 o roddion wedi’i rhoi gan gyfoethogion o Rwsia i’r Blaid Geidwadol yn ddiweddar.

“Rydyn ni i gyd yn gyfarwydd â’r ffordd y mae cyfoeth enfawr, sy’n cael ei ennill trwy ffyrdd dirgel yn Rwsia, ac yn gysylltiedig ag elfennau drwg ar adegau, wedi cael lloches yn Llundain ac yn ceisio prynu dylanwad gwleidyddol yng ngwleidyddiaeth bleidiol gwledydd Prydain,” meddai.

“Rydyn ni’n gwybod bod gwerth dros £800,000 wedi’i roi mewn rhoddion i’r Blaid Geidwadol oddi wrth gyfoethogion o Rwsia a’u cynghreiriaid.”

Beirniadu Paul Flynn

Er bod Paul Flynn wedi dileu’r neges ar Twitter erbyn hyn, mae nifer wedi’i feirniadu am ei sylwadau, gan alw am ymddiheuriad llawn ganddo.

Yn ôl Amandeep SinghBhogal, ymgyrchydd dros y Blaid Geidwadol, mae’n credu y dylai Jeremy Corbyn fynnu bod Paul Flynn yn gwneud “y peth iawn” ac ymddiheuro i’r Blaid Geidwadol a gwneud cyfraniad ariannol i elusen ar gyfer cyn-filwyr.

Yng Nghymru wedyn, mae arweinydd y Ceidwadwyr Cymreig, Andrew RT Davies, wedi dweud bod hyn yn “wael iawn” gan Paul Flynn, er ei fod “yn siŵr” bod yna ymddiheuriad ar y ffordd.

Dyw Paul Flynn ddim wedi cyhoeddi ymddiheuriad eto. Ond mae ei dudalen Twitter yn dangos trydariadau eraill sy’n cefnogi cyhuddiad Jeremy Corbyn yn erbyn y Blaid Geidwadol.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd