‘Y Fam Gymreig’ yn dal yn fyw, meddai cyflwynwraig The One Show

Diweddarwyd  

Alex Jones

Llun trwy Gomin Wicimedia

Mae cyflwynwraig o Rydaman, sydd bellach yn byw a gweithio yn Llundain, yn credu bod y ddelwedd o’r ‘Fam Gymreig’ yng Nghymru yn “dal yn fyw”.

Gwta blwyddyn ar ôl iddi eni ei phlentyn cyntaf, mewn rhaglen ddogfen ar gyfer S4C a fydd yn cael ei darlledu ar Sul y Mamau (Mawrth 11), fe fydd cyflwynwraig The One Show yn teithio ledled Cymru yn sgwrsio gyda mamau, gan holi sut maen nhw’n ymdopi yn yr oes sydd ohoni.

Ac yn ôl Alex Jones, er ei bod hi wedi siarad gyda nifer o “wahanol famau mewn gwahanol sefyllfaoedd”, mae wedi dod i’r casgliad bod yna un elfen benodol sy’n “gyffredin” rhyngddyn nhw.

“Ar ôl siarad gyda naw o famau i gyd,” meddai’r gyflwynwraig wrth golwg360, “y peth o fi’n meddwl oedd yn gyffredin rhyngddyn nhw i gyd oedd yr ysbryd yma i lwyddo, er gwaetha’ rhwystrau bob dydd, a phroblemau bob dydd…

“Fy nheimlad personol i [ar ôl y rhaglen] oedd fod ysbryd y Fam Gymreig yn dal yn fyw… sef y fenyw yma sy’n gryf, ac er gwaethaf pob dim, sy’n mynd ati i daclo bob diwrnod ar ei ben ac yn dod trwyddi ar ddiwedd y dydd.”

Yr oes wedi newid

Wrth gymharu ei sefyllfa ei hun gydag un ei mam, mae Alex Jones yn dweud bod sefyllfa’r fam yn gyffredinol “wedi newid” yn ystod y ganrif ddiwethaf.

“Dw i’n credu bod sefyllfa mamau dros Brydain Fawr wedi newid i gyd,” meddai eto. “Hynny yw, erbyn hyn mae’r fam yn mynd yn ôl i’r gwaith yn lot gynt ´na beth oedd mam yn ei hamser hi.

“Pan ga’th mam fy chwaer a fi, roedd hi bant am ryw saith mlynedd i gyd, ac o’dd dad yn mynd mas i weithio. Ond erbyn hyn, mae’n rhaid i’r fam fynd yn ôl i’r gwaith.”

Er hyn, mae’n mynnu mai’r un “heriau” sy’n wynebu mamau, waeth beth a fo’r oes.

“Mae ‘na heriau gwahanol yn wynebu pob cenhedlaeth, ond yn y pen-draw, mae’n anodd codi plant ´sdim ots ym mha cenhedlaeth chi’n neud e”.

 

Fe fydd Alex Jones: Y Fam Gymreig yn cael ei darlledu ar Sul y Mamau (Mawrth 11) am 8yh.

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Tywysogion Cymru – pa rai sy’n werth eu cofio?