‘Trueni gwirioneddol’ bod prinder awduron Cymraeg yn ceisio am arian

Diweddarwyd  

Mae cylchgrawn Golwg wedi tynnu sylw at y ffaith mai dim ond dau o blith 20 o awduron sy’n cael £3,000 yr un o arian cyhoeddus er mwyn datblygu eu gwaith sydd am wneud hynny yn yr iaith Gymraeg.

Ac yn ôl Cadeirydd y Panel fu’n rhannu’r arian, mae’r sefyllfa yn ‘drueni gwirioneddol’.

Y corff Llenyddiaeth Cymru sy’n rhoi’r grantiau, a hynny dan eu cynllun Ysgoloriaethau i Awduron a Mentora.

Cafwyd 110 o geisiadau am arian, a dim ond saith gan awduron Cymraeg. Ni chafwyd yr un cais gan fardd Cymraeg ei iaith.

‘Trueni gwirioneddol’

Yn ôl Cadeirydd Panel yr Ysgoloriaethau mae’n ‘drueni gwirioneddol’ nad oedd rhagor o lenorion Cymraeg wedi ymgeisio eleni.

‘O ystyried bywiogrwydd y sin lenyddol Gymraeg,’ meddai Sioned Williams yn ei hadroddiad, ‘a adlewyrchir gan fentrau cyffrous fel cylchgrawn Y Stamp, podlediad Clera a disgleirdeb enillwyr eisteddfodau lleol a chenedlaethol, mae’n drueni gwirioneddol nad oes mwy o lenorion Cymraeg, yr ifanc yn enwedig, yn elwa ar y gefnogaeth werthfawr y gallai Ysgoloriaeth gynnig iddynt. Ni ddaeth yr un cais gan fardd Cymraeg eleni.’

Y ddau Gymraeg

Y ddau o’r 21 llwyddiannus a fydd yn datblygu gwaith Cymraeg yw Iwan Huws, canwr Cowbois Rhos Botwnnog, sy’n bwriadu cyhoeddi nofel ffantasi i bobol ifanc, a Siôn Tomos Owen sydd am gyhoeddi nofel llawn lluniau – graphic novel – am y Rhondda.

Ymateb Llenyddiaeth Cymru

Mae Llenyddiaeth Cymru yn pwysleisio bod dau o’r pedwar sydd wedi cael eu derbyn ar y Cynllun Mentora Estynedig i awduron newydd eleni hefyd yn bwriadu sgrifennu yn Gymraeg – sef Euros ap Hywel a Rhiannon Williams.

Serch hynny, mae’r corff yn barod i “adleisio” sylwadau Sioned Williams, gan ddweud mai “da fyddai gweld rhagor o lenorion Cymraeg yn gwneud cais am Ysgoloriaeth a Mentora er mwyn elwa ar y gefnogaeth werthfawr y gallai’r cynlluniau eu cynnig iddynt”.

Y stori lawn gan Non Tudur yn rhifyn wythnos yma o gylchgrawn Golwg.

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Tywysogion Cymru – pa rai sy’n werth eu cofio?