Carwyn Jones yn disgwyl tro pedol gan Lafur ar Ewrop

Diweddarwyd  
Llun pen ac ysgwydd o Brif Weinidog Cymru

Carwyn Jones

Llun: Cynulliad Cenedlaethol Cymru CC 2.0

Mae Carwyn Jones yn rhagweld y bydd arweinydd y Blaid Lafur, Jeremy Corbyn, yn gwneud tro pedol ac yn addo cadw Prydain o fewn Undeb Tollau’r Undeb Ewropeaidd.

Ar ôl trafod y mater gyda Jeremy Corbyn a Syr Keir Starmer, Ysgrifennydd Brexit yr Wrthblaid, mae Prif Weinidog Cymru’n credu bod newid polisi yn debygol o fewn yr ychydig fisoedd nesaf.

“Mae Jeremy yn ddigon clyfar i ddeall bod hon yn drafodaeth sydd angen ei hystyried o’r newydd o bryd i’w gilydd, ond yn bennaf oll rhaid iddi gael ei harwain gan yr hyn sydd orau i bobl Prydain,” meddai Carwyn Jones mewn cyfweliad gyda gwefan newyddion The Independent.

“Nid Brexit caled, sy’n golygu codi rhwystrau rhyngom ni a’n marchnad fwyaf, yw’r dewis iawn.

“Byddai gadael yr Undeb Tollau yn ffolineb economaidd, gan ei fod yn gam sy’n cael ei yrru gan ideoleg a chenedlaetholdeb, nid gan synnwyr cyffredin a phragmatiaeth.”

Rhybuddio Theresa May

Mae Carwyn Jones yn rhybuddio Theresa May y gallai greu argyfwng cyfansoddiadol os bydd yn anwybyddu barn seneddau Cymru a’r Alban ar Fesur Gadael yr Undeb Ewropeaidd.

“Dylai arweinwyr Cymru a’r Alban gael mwy o lais yn y penderfyniadau sy’n ymwneud â Brexit,” meddai.

Dywed fod Theresa May yn un ddigon anodd trafod â hi gan nad yw hi’n rhoi atebion manwl i gwestiynau.

“Yn y cyfarfodydd dw i ddim yn cael llawer o wybodaeth,” meddai. “Os ydw i’n gofyn cwestiynau dw i’n tueddu i gael atebion ystrydebol. Dydyn ni ddim wedi cael trafodaeth o ddifrif ar bethau – dyna’r broblem.

“Mae hyn yn eithaf bisâr mewn ffordd nad ydw i wedi’i weld o’r blaen. Gordon Brown oedd y Prif Weinidog pan ddois i’n Brif Weinidog Cymru, ac wedyn fe ddaeth David Cameron. Roedd llawer mwy o drafodaeth i’w gael gan David Cameron na Theresa May. Yn aml, doedden ni ddim yn cytuno â’n gilydd, ond o leiaf roedd cyd-drafod.

“Ei phersonoliaeth yw hyn – dyna sut un yw hi.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd