Mae enw Gary Speed wedi’i grybwyll yn ystod achos llys cyn-hyfforddwr pêl-droed sydd wedi’i gyhuddo o droseddau rhyw yn erbyn bechgyn ifanc.

Mae cyn-reolwr tîm pêl-droed Cymru’n un o bedwar o bobol sydd wedi lladd eu hunain ar ôl cael eu hyfforddi gan Barry Bennell.

Yn Llys y Goron Lerpwl, mae tystiolaeth wedi’i rhoi gan fachgen oedd wedi cael ei gamdrin gan Bennell.

Dywedodd wrth y llys ei fod e wedi ceisio cysylltu â rhieni Gary Speed i roi gwybod iddyn nhw am y gamdriniaeth, a hynny ar ôl iddyn nhw ddweud nad oedd ganddyn nhw eglurhad am ei farwolaeth.

Cafwyd hyd i Gary Speed yn ei gartref ar ôl iddo grogi ei hun yn 2011.

Dywedodd y tyst ei fod yn ymwybodol o bedwar o bobol sydd wedi lladd eu hunain ar ôl cael eu hyfforddi gan Barry Bennell, a bod Gary Speed yn un ohonyn nhw.

“A oedden nhw wedi lladd eu hunain oherwydd Barry yn unig, dw i ddim yn gwybod, ond y cyfan dw i’n ei wybod yw ei fod e wedi cael effaith arna i a sut allai effeithio ar bobol eraill.”

Mae Barry Bennell yn gwadu 48 cyhuddiad o gamdrin 11 o bobol rhwng 1979 a 1990.

Manchester City

Fe ddaeth honiad heddiw fod prif sgowt Manchester City, Ken Barnes yn gwybod am honiadau yn erbyn Barry Bennell tra ei fod yn gweithio gyda’r clwb.

Dywedodd bachgen y mae Bennell wedi cyfaddef iddo ei gamdrin, ei fod e wedi cael ei gamdrin dros 100 o weithiau tra ei fod e’n chwarae i dîm ieuenctid y clwb dros gyfnod o bedair blynedd.

Dywedodd fod Ken Barnes, a fu farw yn 2010 a hyfforddwr arall, Mike Grimsley, yn gwybod am yr honiadau. Galwodd am ymddiheuriad gan y clwb.

Mae achos llys Barry Bennell yn parhau.