O fis Ebrill ymlaen ni fydd raid i bobol sy’n prynu tŷ yng Nghymru am lai na £180,000 dalu trethi.
Daw hyn yn rhan o gyhoeddiad Llywodraeth Cymru wrth i’r dreth trafodion tir gael ei datganoli i Gymru ym mis Ebrill 2018.
Bwriad hyn, yn ôl Mark Drakeford yr Ysgrifennydd Cyllid, yw helpu pobol i brynu tai ac yn arbennig pobol sy’n prynu tŷ am y tro cyntaf.
Newid yng Nghyllideb yr Hydref
Y cynllun gwreiddiol oedd gosod trothwy o £150,000 ar gyfer y dreth trafodiadau tir.
Ond mae Llywodraeth Cymru wedi penderfynu codi’r trothwy hwn yn dilyn cyhoeddiad Llywodraeth Prydain yng Nghyllideb yr Hydref i ryddhau’r dreth stamp ar bobol sy’n prynu cartref am y tro cyntaf.
Mae disgwyl i 24,000 o brynwyr tai fanteisio o’r newid hwn, gan gynnwys pobol sy’n prynu am y tro cyntaf.
“Bydd y newidiadau rwy’n eu cyhoeddi heddiw i brif gyfraddau’r dreth trafodiadau tir yn golygu na fydd gofyn talu treth ar oddeutu 65% o’r gwerthiannau tai hyn,” meddai Mark Drakeford.
“Bydd mwy o brynwyr yn elwa ar y newidiadau hyn nag a fydd yn elwa ar y rhyddhad y mae’r Canghellor yn ei dargedu at brynwyr tro cyntaf – bydd mwy na hanner y rhai sy’n prynu tai yn manteisio ar ostyngiad treth o ran y dreth trafodiadau tir.”
“Bydd y cyfraddau gwell hyn yn helpu i ddiwallu anghenion a blaenoriaethau Cymru ac yn gwneud gwahaniaeth gwirioneddol i fywydau pobol.”
Cyfraddau eraill
Dyma’r gyfradd trethi yng Nghymru gan ddibynnu ar werth yr eiddo:
Gwerth eiddo Cyfradd treth
£0 – 180,000 0%
£180,000 – £250,000 3.5%
£250,000 – £400,000 5%
£400,000 – £750,000 7.5%
£750,000 – £1.5m 10%
£1.5m + 12%