Sadwrn y siopau bach: galw am gymorth

Diweddarwyd am  
Stryd Fawr

Siopau’r stryd fawr

Llun: Sionk trwy Gomin Wicimedia

Ar Sadwrn y Siopau Bach, mae’r Ceidwadwyr Cymreig wedi galw ar Lywodraeth Cymru i roi cymorth i fusnesau bach a chanolig.

Bwriad y diwrnod yw denu mwy o bobol i siopa yn eu siopau lleol.

Dywedodd llefarydd y Ceidwadwyr ar yr economi, Russell George ei fod yn dymuno gweld Llywodraeth Cymru’n gweithredu ar eu haddewid i leihau trethi busnes, gwella mynediad i gytundebau caffael ac adfywio’r stryd fawr drwy gyflwyno mwy o lefydd parcio rhad ac am ddim.

Cafodd y cynnig ei gyflwyno gan Russell George fel cynllun chwe phwynt, gan alw am:

  • ddiddymu trethi busnes ar gyfer busnesau bach
  • sicrhau mynediad gwell i gytundebau caffael ar gyfer busnesau bach
  • cyflymu’r broses o gyflwyno band llydan ym mhob rhan o Gymru
  • Ariannu Banc Datblygu Cymru er mwyn sicrhau cefnogaeth ariannol i fusnesau bach
  • cyflwyno mwy o lefydd parcio rhad ac am ddim ar gyfer siopwyr
  • Sicrhau hyfforddiant i ddatblygu’r sgiliau sydd eu hangen ar y gweithlu

‘Cyfle gwych’

Dywedodd Russell George: “Mae Sadwrn y Siopau Bach yn gyfle gwych i hybu’r rôl allweddol sydd gan fusnesau bach i’w chwarae, a dyna pam ein bod ni’n galw ar Lywodraeth Lafur Cymru i gymryd camau i’w cefnogi nhw.

“Rydyn ni eisiau gweld trethi busnes yn cael eu diddymu ar gyfer busnesau bach a chanolig yng Nghymru, a gweithredu ystyrlon gan Ysgrifennydd y Cabinet i helpu mwy ohonyn nhw i gael mynediad i gytundebau caffael y sector cyhoeddus.

“Mae ein cynllun chwe phwynt hefyd yn galw ar Lywodraeth Cymru i ddyblu ei hymdrechion i adfywio stryd fawr Cymru drwy gefnogi awdurdodau lleol sy’n cynyddu’r ddarpariaeth o safbwynt llefydd parcio rhad ac am ddim.

“Dylai Sadwrn y Siopau Bach fod yn ddathliad, ond mae angen hefyd i ni feddwl am yr hinsawdd ar hyn o bryd i fusnesau bach yng Nghymru a chanolbwyntio ar y materion sy’n eu hatal nhw rhag cyrraedd eu potensial llawn.

“Gobeithio y bydd Aelodau’r Cynulliad o bob plaid yn cefnogi’r mesurau hyn.

“Mae’n rhaid i Lywodraeth Lafur Cymru chwarae ei rhan, yn amlwg, ond gallwn ni i gyd chwarae ein rhan a chefnogi busnesau bach drwy siopa’n lleol y penwythnos hwn.”

‘Dileu diweithdra dros nos’

Ychwanegodd arweinydd y Ceidwadwyr Cymreig, Andrew RT Davies: “Fel plaid y busnesau bach, mae’r Ceidwadwyr Cymreig ers tro yn tynnu sylw at y rhan allweddol maen nhw’n ei chwarae yn economi Cymru a dyna pam ein bod ni’n parhau i roi pwysau ar Lywodraeth Lafur Cymru i gymryd camau i’w cefnogi nhw’n well.

“Mae 99% o holl fusnesau Cymru’n fusnesau bach a chanolig a phe bai pob un yn cyflogi un gweithiwr ychwanegol, fe ellid dileu diweithdra yng Nghymru dros nos.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd