Mae Cymdeithas yr Iaith wedi croesawu penodiad Eluned Morgan AC fel y Gweinidog newydd sydd â chyfrifoldeb am y Gymraeg.
Mae Alun Davies, y Gweinidog blaenorol, wedi cael ei ddyrchafu o fod yn Weinidog tros y Gymraeg i fod yn Ysgrifennydd Llywodraeth Leol a Gwasanaethau Cyhoeddus.
Bydd y Farwnes Eluned Morgan yn etifeddu’r cyfrifoldeb tros yr iaith yn ei swydd newydd yn Weinidog y Gymraeg a Dysgu Gydol Oes.
‘Croesawu’r penodiad’
Wrth ymateb i’r newyddion, dywedodd Osian Rhys o Gymdeithas yr Iaith Gymraeg: “Rydyn ni’n croesawu’r penodiad. Yr hyn sydd angen i Eluned Morgan ei wneud nawr yw sicrhau bod gwaith go iawn yn cael ei gyflawni er mwyn cyrraedd miliwn o siaradwyr Cymraeg o fewn y degawdau nesaf, targed sydd wedi ennyn cefnogaeth eang iawn ledled y wlad ac yn drawsbleidiol.
“Er mwyn cyrraedd y nod, mae angen cynnydd cyflym ar sefydlu’r cymhwyster Cymraeg cyfun newydd i bob disgybl ac ar ehangu a normaleiddio addysg cyfrwng Cymraeg.
“Mae hefyd angen gollwng cynlluniau annoeth y papur gwyn ar gyfer Bil y Gymraeg sy’n cynnig gwanhau rheoleiddio a diddymu Comisiynydd y Gymraeg.
“Yn wir, byddai’n well gweithredu’r ddeddfwriaeth bresennol yn llawn na bwrw ymlaen gyda chynlluniau niweidiol y papur gwyn.”
