Rowan Williams yn cyflwyno gwobr

Rowan Williams, Archesgob Caergaint
Archesgob Caergaint fydd yn cyflwyno un o’r prif wobrau yn yr Eisteddfod Genedlaethol yn Wrecsam eleni.

Fe fydd Rowan Williams yn cyflwyno gwobr Dewis y Bobl yn y Lle Celf, yr arddangosfa gelf a chrefft.

Mae’r Archesgob yn un o noddwyr Sefydliad Josef Herman sy’n gyfrifol am roi’r wobr o £500 am y gwaith celf mwya’ poblogaidd.

Fe gafodd y gronfa ei sefydlu yn 2002 i hyrwyddo gwerthfawrogiad o’r celfyddydau ac er cof am yr arlunydd o Wlad Pwyl a anwyd union 100 mlynedd yn ôl.

Cofio ‘Jo Bach’

Fe dreuliodd ‘Jo Bach’ flynyddoedd yn byw yn Ystradgynlais gan baentio lluniau o bobol y Cymoedd glo ac fe enillodd Wobr Aur yr Eisteddfod Genedlaethol am Gelf yn Llanelli yn 1962.

Mae gwobr Dewis y Bobl yn cael ei rhoi am y gwaith sy’n cael mwya’ o gefnogaeth mewn pleidlais gan ymwelwyr â’r Lle Celf.

Yn y gorffennol, mae’r cyhoedd wedi cytuno â’r beirniaid a rhoi’r wobr i enillydd y Fedal Aur ond weithiau maen nhw’n mynd i gyfeiriad cwbl wahanol.

Fe fydd y seremoni wobrwyo yn Y Lle Celf brynhawn Sadwrn ola’r Eisteddfod.