Lansio papur newydd sbon yn Sir Benfro

Castell Penfro
Mae cwmni Tindle Newspaper wedi lansio papur newydd wythnosol newydd yn Sir Benfro.

Mae papur newydd The Pembroke and Pembroke Dock Observer tua deg milltir o ardal cylchrediad papur newydd arall y cyhoeddwyr Sir Ray Tindle, sef y Tenby Observer.

Yr un golygwyr fydd yn gweithio ar The Pembroke and Pembroke Dock Observer ond fe fydd yna ragor o waith i newyddiadurwyr ffrilans yr ardal.

Lansiodd y papur newydd ddydd Gwener ac mae disgwyl iddo werthu tua 1,500 o gopïau bob wythnos.

Dywedodd y rheolwr cyffredinol Andrew Adamson fod rhai siopau wedi gwerthu pob copi o’r papur cyntaf ac felly fe allai’r cylchrediad godi i 2,000.

Dywedodd Andrew Adamson wrth y Press Gazette eu bod nhw’n ymateb i alw’r gymuned yn Doc Penfro, oedd wedi bod yn anfon mwy a mwy o newyddion i’w gyhoeddi yn y Tenby Observer.

“Rydyn ni wrth ein boddau fod gan bobol Penfro a Doc Penfro bellach eu ffynhonnell newyddion eu hunain,” meddai.

“Yn ystod cyfnodau economaidd anodd mae’n bwysicach fyth fod pobol leol yn cael gwybod am faterion lleol o bwys, ac rydyn ni’n falch o allu darparu’r gwasanaeth hwnnw.”