Dave Jones yn ystyried ei ddyfodol

Dave Jones, hyfforddwr Caerdydd
Mae hyfforddwr Caerdydd, Dave Jones, wedi dweud ei fod yn ystyried ei ddyfodol â’r clwb ar ôl eu gweld nhw’n colli 3 – 0 yn erbyn Reading yn ail gymal rownd cyn derfynol gemau ail gyfle y Bencampwriaeth.

Daw’r siom ddiweddaraf ar ôl iddyn nhw golli 3 – 2 yn erbyn Blackpool yn y rownd derbynol y gystadleuaeth y llynedd, a methu a chyrraed y gemau ail gyfle y flwyddyn flaenorol.

Dywedodd Dave Jones ei fod yn mwynhau ei swydd, ond y gallai benderfynu roi’r gorau iddi neu fe allai’r bwrdd ofyn iddo fynd.

“Ar y funud dw i’n teimlo’n is na bol neidr,” meddai. “Bydd rhaid i mi ystyried fy mywyd, fy swydd ag a ydw i eisiau parhau.

“Bydd rhaid i’r perchnogion a hierarchaeth y clwb benderfynu a ydyn nhw fy eisiau i.

“Os ydyn nhw’n teimlo fod rywun gwell ar gael mae hynny’n iawn, does gen i ddim problem â hynny. Mae fy CV yn profi fod gen i’r gallu i wneud y gwaith.

“Efallai nad y perchnogion fydd yn penderfynu, ond fi fy hun. Bydd y penderfyniad yn un i’w wneud yng ngolau dydd, yn benderfyniad pwyllog, ac yn benderfyniad i fi yn ogystal a’r perchnogion.

“Mae’n bosib y byddwn nhw’n dweud ‘ie’ a fi’n dweud ‘na’ neu i’r gwrthwyneb. Ond mae yna dân yn fy nghalon o hyd am fy mod i’n caru fy swydd.”