Mae tad, mam-gu a dau o blant maeth wedi marw ar ôl i’w car blymio i gronfa ddŵr ym Mhowys.
Goroesodd y fam oedd yn gyrru’r Peugeot 807 ond fe fu farw ei gŵr, ei mam hithau, a’i phlant.
Roedd y teulu o Bontypridd wedi bod ar wyliau Pasg cynnar ym Machynlleth.
Y gred yn wreiddiol oedd mai dyn a tri o blant oedd yn y car, ond daeth i’r amlwg yn ddiweddarach bod y fam-gu ymysg y meirw.
Mae’r heddlu yn parhau i ymchwilio i beth ddigwyddodd yn Argae Bwlch y Gle, Clywedog, Llanidloes. Mae honno ar fin y ffordd fynydd o Lanidloes i Fachynlleth.
Roedd y tad yn 66 oed a’r fam-gu yn 84, meddai’r heddlu.
Dyn wedi’i arestio
Cafodd dyn o ardal Llanidloes ei arestio ar amheuaeth o yrru yn beryglus. Mae bellach wedi ei ryddhau ar fechnïaeth.
Roedd yn gyrru Ford Mondeo ac, yn ôl yr heddlu, roedd y ddau gar wedi taro ei gilydd wrth yrru i’r un cyfeiriad ar hyd y ffordd.
Syrthiodd y car 20 troedfedd i mewn i’r cronfa ddŵr cyn suddo 30 troedfedd i’r gwaelod.
Llwyddodd timau achub i dynnu’r Peugeot o’r gronfa ddŵr neithiwr. Roedden nhw eisoes wedi tynnu cyrff y dyn a’r plant o’r car.
Dywedodd Heddlu Dyfed-Powys na fyddan nhw’n cyhoeddi unrhyw wybodaeth bellach ynglŷn â’r pedwar nes bod eu perthnasau wedi cael gwybod.
Cafodd yr heddlu eu galw i safle’r ddamwain tua 2.30 y prynhawn.
Anfonwyd hofrennydd Sea King o RAF y Fali ar Ynys Môn, ac roedd dwy injan dân a dau gwch achub hefyd yn rhan o’r gwaith i geisio dod o hyd i’r teulu.
