Pencadlys Cyngor Gwynedd yng Nghaernarfon
Mae criw o ymgyrchwyr lleol wedi bod yn cynnal gwrthdystiad tu allan i swyddfeydd Cyngor Gwynedd yng Nghaernarfon heddiw i alw am gyfleusterau meddygol ym Mlaenau Ffestiniog.
Daw hyn wrth i Bwyllgor Craffu Cyngor Gwynedd gynnal gwrandawiad arbennig gyda chynrychiolwyr o Fwrdd Iechyd Betsi Cadwaladr a Phwyllgor Amddiffyn Ysbyty Goffa Blaenau Ffestiniog.
Mae’r ymgyrchwyr yn galw am gyflwyno mwy o welyau, peiriant Pelydr-X ac adran mân anafiadau yn rhan o’r ysbyty newydd sy’n cael ei hadeiladu ym Mlaenau Ffestiniog.
Gwelyau, Pelydr-X, Mân anafiadau
Ym mis Rhagfyr 2015 cyhoeddodd Llywodraeth Cymru y bydden nhw’n buddsoddi £3.9m i ddatblygu canolfan iechyd newydd ym Mlaenau Ffestiniog gan ei hadeiladu ar safle Ysbyty Coffa Blaenau Ffestiniog.
Mae’r datblygiad yn un o dair canolfan iechyd a gofal cymdeithasol fel rhan o gynllun i drawsnewid gofal iechyd y gogledd gyda lleoliadau eraill yn Llangollen a’r Fflint.
Ond esboniodd cynghorydd ward Diffwys a Maenofferen wrth golwg360 fod yna alw am ailgyflwyno gwelyau fel rhan o’r ganolfan iechyd newydd ym Mlaenau Ffestiniog.
“Maen nhw wedi tynnu deuddeg o welyau o’r ysbyty, maen nhw wedi tynnu’r pelydr-X a’r adran mân anafiadau,” meddai.
“Mae pobol yn gorfod teithio 14 milltir i gael y pethau yma rŵan, ac maen nhw’n gwario £3.9m ar yr adeilad newydd,” meddai wedyn.
Mae disgwyl i’r Pwyllgor Craffu lunio argymhellion drafft am y mater gyda chefnogaeth y swyddogion. Fe fyddan nhw’n eu cyflwyno wedyn yn ystod cyfarfod nesaf y pwyllgor ar Fedi 21.