‘Angen herio Leanne yn agored’

Diweddarwyd am  


Mae un o aelodau amlwg Plaid Cymru wedi dweud bod angen i’w gyd-aelodau roi’r gorau i gwestiynu dyfodol Leanne Wood yn anhysbys, a sefyll yn agored yn ei herbyn mewn ras am yr arweinyddiaeth.

“Os oes rhywun yn teimlo y gallen nhw fod yn well arweinydd na Leanne Wood, dylen nhw sefyll a defnyddio prosesau’r blaid i wneud hynny’n hytrach na dweud pethau’n ddi-enw,” meddai Simon Thomas.

Daw sylwadau’r Aelod Cynulliad yn dilyn straeon sy’n awgrymu bod ei chyd-aelodau yn anhapus gydag arweinyddiaeth Leanne Wood.

Yn ôl BBC Cymru, mae Aelod Cynulliad Plaid Cymru – nad oedd yn fodlon cael ei enwi – wedi galw am etholiad i ddewis arweinydd. Mae’r Pleidiwr anhysbys yn honni bod Leanne Wood “wedi colli awdurdod” ymhlith y grŵp yn y Cynulliad.

Fe ddywedodd Simon Thomas wrth raglen Newyddion 9 S4C: “Beth fyddwn i’n licio i’r blaid ganolbwyntio arno nawr yw’r cwestiwn arweinyddol sydd gennym ni sydd ddim yn troi o gwmpas un person fel arweinydd ond y cwestiwn, ‘a ydyn ni’n perfformio fel grŵp Cynulliad cystal â gallwn ni fod?’

“Dw i ddim yn meddwl ein bod ni, felly mae’n rhaid i ni – bob un ohonon ni – wella’n gêm.”

Cwestiynu dyfodol Leanne “mor amlwg”

Mae Simon Thomas yn Aelod Cynulliad tros Ganolbarth a Gorllewin Cymru, a bu’n Aelod Seneddol Ceredigion am blwc.

Dywedodd wrth y BBC bod cwestiynu dyfodol Arweinydd ei Blaid yn rhywbeth digon naturiol i’w wneud.

“Mae hwnna jest mor amlwg i fi,” meddai Simon Thomas wrth Newyddion 9.

“Dyw hwnna ddim yn dweud unrhyw beth o blaid neu yn erbyn unrhyw berson, mae e jest yn amlwg bod hwnna’n mynd i fod yn rhan o’r drafodaeth.

“Os oes rhywun yn teimlo y gallen nhw fod yn well arweinydd na Leanne Wood, dylen nhw sefyll a defnyddio prosesau’r blaid i wneud hynny’n hytrach na dweud pethau’n ddienw.”

Yn ôl cyfansoddiad y Blaid, rhaid i’r Arweinydd sefyll i gael ei ail-ethol bob dwy flynedd, a daw’r cyfle nesaf i herio Leanne Wood y flwyddyn nesaf.

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd