Y Llyfrgell Genedlaethol yn cyflogi Wicipediwr parhaol cyntaf gwledydd Prydain
Mae’r Llyfrgell Genedlaethol yn Aberystwyth wedi cyflogi Jason Evans yn Wicipediwr parhaol cyntaf gwledydd Prydain.
Fe fydd yn gyfrifol am sicrhau bod Wicipedia a gwefannau cysylltiedig yn rhan ganolog o waith y llyfrgell o ddydd i ddydd, gan ddatblygu ar y bartneriaeth lwyddiannus rhwng y Llyfrgell, Wikimedia UK a’r gymuned Wici.
Mae’r Llyfrgell a Wikimedia UK yn cydweithio ers 2014 i gynnal swydd Wicipediwr Preswyl, gan roi mynediad i ddefnyddwyr i bob math o wybodaeth am Gymru a’i phobol.
Enillodd y Llyfrgell wobr ‘Partneriaeth y Flwyddyn’ yng Ngwobrau Wicimediwr y Flwyddyn y Deyrnas Gyfunol am eu gwaith dylanwadol a’u gweledigaeth yn gwneud y rôl yn barhaol.
Prosiectau
Mae delweddau o eitemau’r Llyfrgell wedi’u cynnwys mewn erthyglau sydd wedi cael eu gweld mwy na 250 miliwn o weithiau.
Mae Jason Evans hefyd wedi cynnal 20 o ddigwyddiadau cyhoeddus ac wedi dysgu mwy na 100 o bobol i olygu tudalennau Wicipedia er mwyn gwella cynnwys y tudalennau.
Mae’r Llyfrgell hefyd wedi arwain prosiect Wicipop, sydd wedi’i ariannu gan Lywodraeth Cymru ac sydd wedi creu cannoedd o erthyglau, gyda chwmni Recordiau Sain yn rhannu dros 7,000 o glipiau sain sy’n cyd-fynd â’r erthyglau.
Mae hefyd yn arwain y prosiect Wici-Iechyd dan nawdd Llywodraeth Cymru gyda’r nod o wella pynciau perthnasol i iechyd ar y Wicipedia Cymraeg.
Wicipedia yw’r wefan sy’n cael ei defnyddio fwyaf yn y Gymraeg, gyda chyfartaledd o 800,000 o dudalennau’n cael eu hagor bob mis, ac mae ganddi oddeutu 130 o olygyddion cyson sy’n cael eu hannog gan Jason Evans i fynd ati.
Mae Wicipedia yn un o’r gwyddoniaduron mwyaf mewn unrhyw un o ieithoedd lleiafrifol y byd.
Swydd sy’n “dangos dyhead”
“Er budd Cymru fel cenedl, mae’n hollbwysig fod Wicipedia yn cynnwys cyfoeth o wybodaeth am ein hanes a’n diwylliant, a bod gwybodaeth ar yr ystod ehangaf o bynciau ar gael ar y Wicipedia Cymraeg,” meddai Pedr ap Llwyd, Cyfarwyddwr Casgliadau a Rhaglenni Cyhoeddus y Llyfrgell Genedlaethol.
“Mae gan Lyfrgell Genedlaethol Cymru ran allweddol yn y gwaith o roi mynediad i wybodaeth am Gymru a’i phobl, ac mae’r swydd hon yn dangos ein dyhead i gydweithio gydag unigolion a chyrff o fewn i Gymru a thu hwnt wrth gyflawni’r amcan hwn.”
