Nia Griffith yn condemnio ymosodiadau’r IRA

Nia Griffith AS
Mae Ysgrifennydd Amddiffyn yr wrthblaid, Nia Griffith, wedi condemnio ymosodiadau’r IRA yng Ngogledd Iwerddon, yn dilyn beirniadaeth o’r Blaid Lafur am safiad Jeremy Corbyn ac aelodau eraill y blaid.

Mae nifer o aelodau blaenllaw Llafur, gan gynnwys yr arweinydd Jeremy Corbyn, a’r Canghellor Cysgodol, John McDonnell, wedi cael eu beirniadu’n ddiweddar am wrthod â chondemnio ymosodiadau’r IRA.

Mae Jeremy Corbyn wedi condemnio “gweithredoedd o drais o le bynnag y daeth” yn ystod y Trafferthion yng Ngogledd Iwerddon ond mae wedi gwrthod  condemnio’r IRA o fod yn frawychwyr.

“Dw i ddim yn mynd i siarad ar ran fy arweinydd,” meddai Nia Griffith, Aelod Seneddol Llanelli, wrth annerch dadl yn Sefydliad y Gwasanaeth Unedig Brenhinol.

“Ond gallaf ddweud fel rhywun sydd yn medru cofio’r Trafferthion yng Ngogledd Iwerddon, dw i heb unrhyw amwyster yn condemnio ymosodiadau bom yr IRA yng Ngogledd Iwerddon.”

“Brawychus”

“O ran yr IRA, dw i’n hapus i gondemnio brawychiaeth o le bynnag y daw,” meddai Gweinidog Amddiffyn Llywodraeth y Deyrnas Unedig, Harriett Baldwin.

“Dw i’n bersonol yn credu ei bod hi’n frawychus ei bod hi’n bosib y gall person, wnaeth gefnogi’r unigolion oedd wedi ein bomio ni – y Blaid Geidwadol – yn Brighton yn yr 1980au, fod yn Brif Weinidog.”