RSS

Golwg360

MwyCau 

Theresa May yn “gwrthod cenedlaetholdeb obsesiynol”

Mawrth 17, 2017 14:46


Mae Theresa May wedi dweud mai’r Ceidwadwyr yw plaid y tir canol yng ngwleidyddiaeth Prydain erbyn hyn, wrth iddi annerch cynhadledd ei phlaid yng Nghaerdydd.

Dywedodd ei bod yn “gwrthod Llafur chwith eithafol, [gwleidyddiaeth] dde libertaraidd UKIP a chenedlaetholdeb obsesiynol Plaid Cymru a’r SNP”.

“Mae’r SNP yn dadlau y dylwn rannu’r Deyrnas Unedig am ein bod yn gadael yr Undeb Ewropeaidd,” meddai

“Ond tair blynedd yn ôl fe wnaethon nhw ymgyrchu am ganlyniad y byddai wedi tynnu’r Alban allan o’r Undeb Ewropeaidd yn gyfan gwbl.

“Maen nhw’n hapus i weld pŵer yn aros ym Mrwsel. Ond os bydd y pwerau hynny’n dod yn ôl i Lundain… maen nhw am iddyn nhw fynd i Gaeredin… fel eu bod nhw’n gallu ceisio rhoi nhw yn ôl i Frwsel.

“A nawr maen nhw’n dweud, mae’n debyg, na fyddai Alban annibynnol yn ceisio dod yn aelod o’r Undeb Ewropeaidd yn dilyn pleidlais ar rannu.

“Mae’n anhrefn ar ben anhrefn.”

Brexit – “optimistiaeth a gobaith”

Dywedodd Theresa May y byddai cynllun y blaid dros Brydain yn delifro gwlad “gryfach a thecach,” gan bwysleisio bod “ein dyddiau gorau eto i ddod” ar ôl gadael yr Undeb Ewropeaidd.

“Yn ystod y pythefnos nesaf, bydda i’n tanio Erthygl 50 ac yn dechrau trafodaethau i sicrhau ymadawiad y Deyrnas Unedig o’r Undeb Ewropeaidd,” meddai.

“Ar gyfnodau o’r fath – cyfnodau cenedlaethol mawr sy’n diffinio ein cymeriad fel cenedl – mae gennym ddewis.

“Gallwch edrych ymlaen gydag optimistiaeth a gobaith. Neu roi mewn i wleidyddiaeth ofn ac anobaith.

“Rydw i’n dewis credu mewn Prydain a bod ein dyddiau gorau eto i ddod.”

Brexit Theresa May

Dywedodd ei bod yn benderfynol o gael y “fargen gywir i Brydain” ac y byddai hyn yn cynnwys:

  • Cadw’r Ardal Deithio Gyffredin ag Iwerddon
  • Rheoli mewnfudo
  • Cadw hawliau dinasyddion yr UE ym Mhrydain a dinasyddion Prydain yn yr UE
  • Gwella hawliau gweithwyr
  • Masnach rydd gyda marchnadoedd Ewropeaidd
  • Cytundebau masnachu newydd gyda gwledydd eraill

Y bore yma roedd fforwm Wanwyn y Ceidwadwyr ar lefel y Deyrnas Unedig a bydd cynhadledd y Ceidwadwyr Cymreig yn dechrau’r prynhawn yma.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.