RSS

Golwg360

MwyCau 

“Pryderon” y Torïaid tros gynllun i ddysgu Cymraeg i weithwyr

Ionawr 26, 2017 12:52 Diweddarwyd am 14:36


Yn dilyn cyhoeddi gwerth tair miliwn o bunnoedd i’r Ganolfan Dysgu Cymraeg Genedlaethol i hybu mwy o Gymraeg yn y gweithle, mae’r Ceidwadwyr Cymreig wedi mynegi pryderon.

Yn ôl Suzy Davies, llefarydd y blaid ar y Gymraeg, mae’n “bryder” na fydd yr arian hwn ar gael i weithleoedd yn y sector preifat ac elusennau.

Yn y cyfamser, mae aelod arall o’r Ceidwadwyr Cymreig, Darren Millar, wedi dweud y dylai rhieni di-Gymraeg sy’n anfon eu plant i ysgolion Cymraeg gael gwersi Cymraeg am ddim.

Un o rolau’r Ganolfan Dysgu Cymraeg Genedlaethol yw helpu’r 80 o gyrff cyhoeddus sy’n glynu at safonau Cymraeg Comisiynydd y Gymraeg.

Mae Llywodraeth Cymru wedi dadlau bod Comisiynydd y Gymraeg yn cynnig cymorth i fusnesau ar hybu a hyrwyddo’r Gymraeg.

“Tra ein bod yn cefnogi unrhyw ymdrech i gefnogi sefydliadau i chwarae eu rhan yn gwneud y Gymraeg yn rhan o fywyd pawb, mae’n bryder bod rhannau helaeth o weithle Cymru yn cael eu gadael allan o’r fenter,” meddai Suzy Davies.

Dywedodd fod 27% o weithwyr Cymru yn gweithio i sefydliadau yn y sector cyhoeddus, tra bod y mwyafrif yn gweithio i’r trydydd sector a’r sectorau preifat.

“Os yw Llafur o ddifrif am gyrraedd ei tharged uchelgeisiol o filiwn o siaradwyr, yna rhaid iddi ddechrau adeiladu ar y syniad bod y Gymraeg yn iaith fusnes.

“Felly beth am ddechrau mentrau cymdeithasol a busnesau preifat eraill fel rhan o’r ateb?”

Cymraeg i rieni

Mae’r ateb hefyd yn rhoi gwersi Cymraeg am ddim i rieni plant sy’n mynd i ysgolion Cymraeg, yn ôl Darren Millar, AC dros Orllewin Clwyd.

“Gallai rieni ar eu hennill o wersi Cymraeg am ddim a byddaf i’n annog Llywodraeth Cymru i ystyried y gost ar ymarferoldeb o gyflwyno hyn fel cynllun prawf.

“Dylai costau ddim fod yn rhwystr i bobol sy’n ceisio dysgu Cymraeg, byddai unrhyw gostau tymor byr i’r llywodraeth yn troi’n enillion yn yr hir dymor.”

Mwy o gynlluniau “maes o law”

Mae’r cynllun yn rhan o strategaeth Llywodraeth Cymru i gyrraedd miliwn o siaradwyr Cymraeg erbyn 2050.

Mae’r cynllun yn rhan o ymrwymiad Llywodraeth Cymru i glustnodi £5 miliwn yn ychwanegol i’r Gymraeg yn ei chyllideb 2017/18 – hynny ar ôl dod i gytundeb ar y gyllideb gyda Phlaid Cymru.

Dywedodd Llywodraeth Cymru y bydd cyhoeddiad ar sut fydd y £2 miliwn arall yn cael ei wario “maes o law.”

Mae golwg360 wedi gofyn am eu hymateb i sylwadau Suzy Davies a dywedodd llefarydd fod Comisiynydd y Gymraeg yn cynnig cymorth i fusnesau ar hybu a hyrwyddo’r Gymraeg.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.