RSS

Golwg360

MwyCau 

Corwynt yn Aberystwyth – canslo darlithoedd

Tachwedd 17, 2016 14:02 Diweddarwyd Tachwedd 18, 2016 08:16


Difrod yng Nghlarach (Llun: Thomas Scarrott)
Mae gwyntoedd cryfion ar raddfa corwynt wedi taro Aberystwyth y bore yma, gyda’r brifysgol yn rhybuddio staff a myfyrwyr i fod yn wyliadwrus.

Mae rhai adeiladau wedi’u difrodi a choed wedi dymchwel mewn mannau yn dilyn gwyntoedd o hyd at 94 milltir yr awr.

Mae’r Heddlu wedi cau sawl ffordd yn y dref, gan gynnwys Stryd y Farchnad, Heol y Wig, Ffordd y De o achos bod teils toeon yn disgyn i’r llawr.

Mae Rhiw Penglais a’r ffordd y tu allan i Aberystwyth, rhwng Clarach a Borth, hefyd wedi cau o achos bod coeden wedi disgyn i’r ffordd.

Mae’r gwynt wedi gostegu erbyn hyn i tua 40 milltir yr awr ond mae rheolwyr Prifysgol Aberystwyth yn rhybuddio staff a myfyrwyr i gymryd gofal.

Mae disgwyl llanw uchel yn y môr am 10 o’r gloch heno ac mae rhybudd i bawb gadw’n glir a bod yn ofalus.

Mae’r Brifysgol wedi rhybuddio hefyd ei bod yn cynnal arolygiad llawn o’i holl safleoedd a’i bod yn bosib y bydd rhaid iddyn nhw gau rhai adeiladau.

Canslo darlithoedd

Mae Prifysgol Aberystwyth wedi penderfynu canslo darlithoedd ar gampws Penglais a Llanbadarn am weddill y dydd o ganlyniad i’r tywydd gwael.

Mae’r adeiladau / gwasanaethau canlynol ar gau am weddill y dydd hefyd.

  • Yr Hen Goleg
  • Y Ganolfan Chwaraeon
  • IBERS Bach
  • Brynamlwg
  • Llyfrgell Thomas Parry (Llanbadarn)
  • Blas Padarn (Llanbadarn)

Mae’r Brifysgol yn annog myfyrwyr i fynd yn ôl at eu llety cyn gynted â phosib ac i aros mewn a chadw llygad ar eu he-bost.

Mae darlithoedd ar gampws Gogerddan, y tu allan i Aberystwyth, yn parhau fel arfer.

Mae staff prif gampysau’r Brifysgol, Penglais a Llanbadarn yn cael eu hannog i fynd adre hefyd ac i fod yn ofalus ar y ffordd wrth deithio nôl.


To tŷ ar bromenâd Aberystwyth wedi ei ddifrodi. (Llun: Anna Jones)

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.