Y bwriad yw adeiladu 93 o dai ym Mharc Sychnant
Mae gwrandawiad apêl yn cael ei gynnal heddiw i gynllun dadleuol i adeiladu 93 o gartrefi newydd yng Nghonwy.
Y cwmni datblygu, Beech Developments, sydd wedi cyflwyno’r apêl wedi i Gyngor Conwy wrthod eu cais gwreiddiol ym mis Chwefror eleni.
Mae’r cwmni am ddatblygu 93 o dai ym Mharc Sychnant, ond gwrthododd y Cyngor hyn yn gynharach eleni am nad yw’r safle yn disgyn o fewn Cynllun Datblygu Lleol yr ardal.
Roedden nhw hefyd wedi nodi y byddai’r datblygiad yn cyfrannu at broblemau traffig yr ardal.
Ond, mae’r cwmni wedi apelio yn erbyn y penderfyniad a bydd gwrandawiad yn dechrau heddiw yn swyddfeydd y Cyngor.
Pryderon lleol…
Mae criw o bobol leol wedi dod at ei gilydd i wrthwynebu’r cynllun, sef Grŵp Preswylwyr Sychnant.
Un ohonynt yw Morgan Dafydd a dywedodd wrth Golwg360: “mae’r Cyngor eisoes wedi gwrthod y cynllun ar sail nifer o bwyntiau…
“Mae yna oblygiadau i drafnidiaeth a does ddim llwybrau cerdded addas yna,” meddai.
“Rydyn ni hefyd yn poeni am effaith y datblygiad ar y Gymraeg oherwydd er eu bod nhw’n dweud y byddai’r tai ar gyfer pobol leol, rydyn ni’n rhagweld y byddai’n denu llawer o bobol o ffwrdd i symud i mewn i’r ardal,” meddai wedyn.
“Mae’r safle dim ond ychydig fetrau i ffwrdd o Barc Cenedlaethol Eryri, felly mae’n amlwg pam fod gan y cwmni ddiddordeb mawr i ddatblygu’r cae.”
Dywedodd y bydd criw o ymgyrchwyr yn ymgynnull tu allan i swyddfeydd y Cyngor hefyd i ddangos eu gwrthwynebiad.
