Gohirio protest Pantycelyn

Diweddarwyd am  


Jeff Smith ac ymgyrchwyr Pantycelyn
Mae myfyrwyr Cell Pantycelyn wedi penderfynu gohirio protest ynghylch dyfodol Neuadd Breswyl Pantycelyn yn dilyn cyfarfod cadarnhaol gydag uwch swyddogion Prifysgol Aberystwyth heddiw.

Roedd y myfyrwyr yn pryderu ynghylch yr ansicrwydd am ddyfodol y neuadd.

Ond bellach maen nhw’n hapus gyda’r atebion ynghylch yr amserlen ar gyfer dyfodol y neuadd Gymraeg.

Dywedodd Jeff Smith, aelod o’r Gell a fu yn y cyfarfod: “Dw i’n falch ein bod wedi cael addewid o amserlen o’r prif gamau allweddol i ail-agor y neuadd erbyn 2019, a bod swyddogion y brifysgol wedi addo cyfathrebu yn well gyda’r myfyrwyr a’r cyhoedd ar yr adeg dyngedfennol hon. Dyna rywbeth sydd wedi bod ar goll – a thynnu sylw at hynny oedd y bwriad yn y brotest roedden ni wedi ei threfnu yn ystod diwrnod agored y Brifysgol yfory.”

Dywedodd Manon Elin, a fu hefyd yn cynrychioli’r Gell yn y cyfarfod: “Rydyn ni’n teimlo fod y cyfarfod wedi bod yn un buddiol iawn, gyda sicrwydd fod Pantycelyn ymhlith tair prif flaenoriaeth cyllido’r Brifysgol. Bydd cyfle gan y myfyrwyr newydd y flwyddyn nesaf i fyw yn neuadd Pantycelyn yn ystod eu trydedd flwyddyn, felly gobeithiwn y bydd y sicrwydd yma yn arwain at gynnydd yn nifer y myfyrwyr fydd yn dod i brofi cymuned Gymraeg y Brifysgol ym Mhantycelyn. Fyddwn ni ddim yn cynnal unrhyw ddigwyddiad yfory felly, ond byddwn ni’n parhau i gadw llygad ar y Brifysgol i sicrhau eu bod yn cadw at yr amserlen.”

Penseiri Panti

Yn y cyfamser, mae Prifysgol Aberystwyth wedi penodi tîm o benseiri cyfrwng Cymraeg i weithio ar gynlluniau manwl i ailddatblygu Neuadd Pantycelyn.

Penseiri Lawray, sydd â swyddfeydd yn Llundain, Caerdydd a Wrecsam, sydd wedi cael y cytundeb i wneud y gwaith ar Bantycelyn yn dilyn “proses dendro gystadleuol”.

Bydd y cwmni’n gyfrifol am y cam nesaf yn y cynlluniau datblygu ar gyfer y prosiect £10m i ddarparu 200 o ystafelloedd en-suite ar gyfer myfyrwyr ynghyd â darpariaeth arlwyo. Mae gofodau cymdeithasol a chyfleusterau at ddefnydd myfyrwyr a’r gymuned leol hefyd yn rhan o’r cynlluniau.

Bydd angen i Lawray baratoi cais am Ganiatâd Adeilad Rhestredig er mwyn cael caniatâd cynllunio i wneud y gwaith.

Yn ôl y Brifysgol, mae’r cyhoeddiad yn golygu cadw at yr amserlen a osodwyd ar gyfer ailagor yr adeilad erbyn mis Medi 2019.

Mae swyddfeydd Undeb Myfyrwyr Cymraeg Aberystwyth UMCA ym Mhantycelyn ar hyn o bryd ac fe ddywedodd y Llywydd, Rhun ap Dafydd: “Mae hyn yn newyddion calonogol iawn ac mae UMCA yn edrych ‘mlaen at gydweithio gyda’r penseiri er mwyn siapio Pantycelyn at y dyfodol.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd