RSS

Golwg360

MwyCau 

Cairns yn cwestiynu’r croeso yn Y Fro Gymraeg

Hydref 7, 2016 12:00 Diweddarwyd am 12:02


Alun Cairns
Mae Ysgrifennydd Gwladol Cymru wedi cael ei feirniadu am ei sylwadau ar raglen Question Time neithiwr ynghylch cymunedau Cymraeg a llosgi tai haf.

Wrth ymateb i gwestiwn ar fewnfudo ym Mhrydain, roedd Alun Cairns yn beirniadu arweinydd Plaid Cymru, Leanne Wood, gan awgrymu nad yw aelodau ei phlaid yn croesawu siaradwyr Saesneg i gymunedau Cymraeg eu hiaith.

Dywedodd Alun Cairns fod “cymunedau yng Nghymru lle mae ymgyrchwyr cenedlaetholgar sy’n gweithredu yn uniongyrchol yn erbyn pobol sy’n dod i mewn.

“Doedd hi ddim mor hir yn ôl pan oedd bythynnod yn cael eu llosgi i’r llawr.”

Fe ddywedodd Leanne Wood ar y rhaglen fod ei sylwadau yn “warthus”.

Fe wnaeth Gweinidog y Gymraeg Llywodraeth Cymru ei feirniadu ar Twitter hefyd, gan alw ei sylwadau yn “gywilyddus”.

“Mae ceisio cysylltu cefnogaeth i’n hiaith gyda hiliaeth yn ofnadwy,” meddai Alun Davies.

“Taflu baw”

Mewn datganiad heddiw, dywedodd Leanne Wood bod Alun Cairns yn euog o “wyrdroi hanes drwy daflu baw” ac o “wadu’r rhethreg niweidiol sy’n britho ei blaid Geidwadol ei hun ar hyn o bryd”.

“Mae Plaid Cymru’n blaid eangfrydig a rhyngwladol. Rydym yn gwerthfawrogi cyfraniad pawb yma, o ble bynnag y maent wedi dod yn wreiddiol,” ychwanegodd.

“Rydym yn gweithio’n galed tuag at gydraddoldeb, yn ceisio rhoi terfyn ar raniadau ac mae gennym hanes hir o ddathlu amrywiaeth. Mae gennym fwy o ddiddordeb mewn adeiladu pontydd na waliau.”

“Mae Ysgrifennydd Gwladol Cymru yn euog o bedlera’r union fath o nonsens sy’n magu gelyniaeth a throi pobl yn erbyn ei gilydd.

“Nid dyma’r fath o sylwadau fyddai rhywun yn eu disgwyl gan weinidog llywodraeth. Pe bai ganddo owns o onestrwydd byddai’n tynnu ei eiriau yn ôl.”

Mae golwg360 wedi gofyn am ymateb gan Swyddfa Cymru.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.