Jeremy Corbyn yn fwy poblogaidd nag Owen Smith yng Nghymru

Yn ôl yr arolwg barn diweddaraf, mae Jeremy Corbyn yn fwy poblogaidd yng Nghymru na’i wrthwynebydd yn ras arweinyddiaeth Llafur, Owen Smith.

Er bod Owen Smith yn Gymro ac yn Aelod Seneddol i Bontypridd, dywedodd 32% o bobol mai Jeremy Corbyn fyddai’n cael eu pleidlais nhw, o gymharu â 27% i Owen Smith.

Roedd 41% o’r 1,001 o bobol a gafodd eu holi ddim yn gwybod i ba ddyn fyddan nhw’n pleidleisio.

O bleidleiswyr Llafur yng Nghymru, roedd y ffigwr yn uwch, gyda 47% yn cefnogi Corbyn a 30% yn nhîm Smith.

Poblogrwydd y Torïaid

Ond mae’r arolwg YouGov ar gyfer ITV Cymru a Phrifysgol Caerdydd yn dangos bod cefnogaeth i’r Ceidwadwyr ymhlith pobol Cymru ar ei lefel uchaf ers chwe blynedd.

Dyma’r pôl piniwn cyntaf i’w gael ei wneud yng Nghymru ers i Theresa May ddod yn arweinydd y Ceidwadwyr ym Mhrydain ac yn Brif Weinidog.

Mae’r blaid wedi gwneud 6% yn well na wnaeth yn yr arolwg diwethaf, pan holwyd pobol i bwy fyddan nhw’n pleidleisio yn etholiad cyffredinol San Steffan.

“Yn gyffredinol, mae’r arolwg newydd hwn yn dangos cynnydd sylweddol yn ffawd y blaid Geidwadol,” meddai’r Athro Scully o Ganolfan Llywodraethiant Cymru.

“Mae hyn yn cadarnhau bod y darlun ehangach sydd wedi’i nodi mewn arolygon diweddar ledled Prydain yn berthnasol yng Nghymru hefyd.

“Dyw hi ddim yn anarferol i Brif Weinidogion newydd, neu arweinyddion pleidiau mawr fwynhau cyfnod o fis mêl.

Er bydd mis mêl Theresa May yn debygol o bara’n hirach nag un Jeremy Corbyn, ar ôl iddo gael ei ethol yn arweinydd y Blaid Lafur, mae Roger Scully’n rhybuddio bod pob cyfnod tebyg yn dod i ben rhyw ben.

Newyddion gwael i Blaid Cymru

Neidiodd Llafur 1% ymlaen, o gymharu â cholli 5% o gefnogaeth yn y pôl tri mis yn ôl, tra bod Plaid Cymru wedi syrthio yn ôl 3% y tro hwn.

Ar eu hôl nhw mae UKIP, a syrthiodd 2% a’r Democratiaid Rhyddfrydol, sydd wedi mynd yn ôl 1%.

Yn ôl Roger Scully, ar sail y canlyniadau hyn a phe bai Etholiad Cyffredinol yn digwydd fory, byddai Llafur yn ennill 24 sedd, gan golli Ynys Môn.

Plaid Cymru fyddai’n ennill y sedd honno, gan gael cyfanswm o 4 sedd, gyda’r Torïaid yn dal i feddu ar 11 sedd a’r Democratiaid Rhyddfrydol yn dal i gadw un.

Ond dan y ffiniau etholaethau newydd, a allai ddod i rym cyn yr etholiad nesaf, byddai Llafur yn cael 15 sedd, y Ceidwadwyr ar 10, Plaid Cymru yn cael 3 a’r Democratiaid Rhyddfrydol o hyd ar 1.

Y ffigurau

Y Ceidwadwyr Cymreig sydd wedi gweld y gwelliant mwyaf yn ei pherfformiad o ran etholiadau’r Cynulliad hefyd, gan gynyddu ei phleidlais 5%.

Ond Llafur Cymru sydd yn dal i fod ar y blaen gyda 34%, gan gynyddu 2% ers yr arolwg diwethaf.

Mae Plaid Cymru, UKIP a’r Democratiaid Rhyddfrydol i gyd wedi colli 1% o gefnogaeth ers yr arolwg ym mis Gorffennaf, gyda Phlaid ar 20%, UKIP ar 13% a’r Democratiaid ar 6%.

Mae canlyniadau’r seddi rhanbarthol yn rhywbeth tebyg, a fyddai’n arwain at y casgliad hwn, pe bai etholiadau’r Cynulliad yn cael eu cynnal yn syth.

Llafur 26 sedd (25 etholaeth, 1 rhanbarthol) Ceidwadwyr 14 sedd (8 etholaeth, 6 rhanbarthol)

Plaid Cymru 12 sedd (6 etholaeth, 6 rhanbarthol) UKIP 7 sedd (7 rhanbarthol) a’r Democratiaid Rhyddfrydol 1 sedd (1 etholaeth).