Llun: PA
Mae adroddiad newydd wedi datgelu mai Sir Fynwy yw’r lle gorau yng Nghymru i ferched ifanc gael eu magu ac mai Merthyr Tudful yw’r gwaethaf.
Mae adroddiad y sefydliad Plan International UK yn dangos bod anghyfartaledd mawr rhwng siroedd y wlad – ar ôl ystyried ffactorau fel tlodi ymysg plant, disgwyliad oes, cyfraddau beichiogrwydd, canlyniadau ysgol a faint o ferched sydd ddim mewn gwaith na hyfforddiant.
Roedd yr arbenigwyr y tu ôl i’r gwaith hefyd yn edrych ar ffigyrau gan luoedd heddlu ynglŷn â throseddau sy’n cael eu cyflawni yn erbyn merched, gan gynnwys troseddau rhywiol a thrais yn y cartref.
Am bob 1,000 o ferched, fe gafodd 3.61% eu cam-drin o fewn ffiniau Heddlu De Cymru a 3.20% yn ardal Heddlu Gwent.
Dim ond Swydd Gaerhirfryn (5.11%) a Manceinion (3.69%) oedd yn uwch ar y rhestr o ystyried Cymru a Lloegr.
Chwarae teg
“Fe welwyd yn yr adroddiad nad yw Prydain, ar y cyfan, yn rhoi chwarae teg i ferched,” meddai Lucy Russell, prif awdur y gwaith.
“Er mai dyma un o’r llefydd mwyaf cyfoethog, datblygedig yn y byd, nid yw merched yn cael hawliau a chyfleoedd bywyd cyfartal.”
Dyma restr o’r awdurdodau gorau a’r gwaethaf, yn ôl Plan International UK:
Gorau |
Gwaethaf |
||
1 | Sir Fynwy | 12 | Castell Nedd Port Talbot |
2 | Powys | 13 | Dinbych |
3 | Morgannwg | 14 | Wrecsam |
4 | Ceredigion | 15 | Casnewydd |
5 | Gwynedd | 16 | Torfaen |
6 | Sir Y Fflint | 17 | Blaenau Gwent |
7 | Abertawe | 18 | Rhondda, Cynon Taf |
8 | Caerfyrddin | 19 | Casnewydd |
9 | Ynys Môn | 20 | Caerffili |
10 | Sir Benfro | 21 | Caerdydd |
11 | Conwy | 22 | Merthyr Tudful |