Holi barn trigolion y gogledd am Wylfa Newydd

Safle Wylfa Newydd Llun: Horizon
Bydd gan drigolion gogledd Cymru gyfle dros yr wythnosau nesaf i leisio eu barn am gynlluniau i adeiladu ail atomfa niwclear ar Ynys Môn wrth i gwmni Horizon lansio ei ail ymgynghoriad ar y pwnc.

Mae’r ymgynghoriad ar “gynlluniau diwygiedig” y cwmni yn agor heddiw ac yn cau ar 25 Hydref eleni.

Mae Horizon yn gobeithio cyflwyno cais am Orchymyn Caniatâd Datblygu yn 2017, a dyma’r ymgynghoriad swyddogol olaf ar y gwaith tan i’r cwmni wneud hynny.

Mae’r ymgynghoriad yn gofyn barn ynghylch safle llety gweithwyr dros dro, effaith y prosiect ar yr amgylchedd a materion yn ymwneud â’r Gymraeg.

‘Dileu amod allweddol’

Mae Horizon yn ceisio dileu un o’r amodau allweddol o Gynllun Datblygu Lleol newydd Gwynedd a Môn sy’n ymwneud â diogelu’r Gymraeg.

Mae’n nhw’n gofyn yn benodol am ddileu o Bolisi Strategol 1: Iaith a diwylliant Cymraeg y rhan sy’n nodi y bydd y Cynghorau’n “gwrthod cynigion a fyddai oherwydd eu maint, graddfa neu leoliad yn achosi niwed arwyddocaol i gymeriad a chydbwysedd iaith cymuned.”

Mae’r cwmni’n honni bod y polisi yn “rhy gyfyngol”, ac y byddai peidio â’i ddiwygio yn “gallu peryglu cyflenwi prosiect Wylfa Newydd a datblygiadau cysylltiedig”.

Ymgynghoriad

Mae modd cymryd rhan yn yr ymgynghoriad ar-lein a bydd Horizon yn cynnal arddangosfeydd cyhoeddus mewn lleoliadau ar draws gogledd Cymru.

Bydd hefyd sesiynau galw heibio ym maes parcio’r Douglas Inn yn Nhregele rhwng 11 y bore a 2 y prynhawn yn ystod y cyfnod ymgynghori.

Dyma ddyddiadau’r arddangosfeydd cyhoeddus:

Dydd Mawrth 6 Medi

1yp – 7yp

Clwb Cymdeithasol a Chwaraeon Wylfa, Gorsaf Bŵer Wylfa, Bae Cemaes

Dydd Mercher 7 Medi

1yp – 7yp

Neuadd Bentref Cemaes, Stryd Fawr, Cemaes

Dydd Gwener 9 Medi

1yp – 7yp