Mae galw am newid enw’r Cynulliad Cenedlaethol i Senedd Cymru cyn i Fesur Cymru ddod i rym
Mae Jane Hutt wedi galw am newid enw’r Cynulliad Cenedlaethol i Senedd Cymru cyn i Fesur Cymru ddod i rym.
Mae’r hawl i enwi’r sefydliad wedi’i gynnwys yn y mesur sydd dan ystyriaeth yn San Steffan ar hyn o bryd.
Ond mae Hutt yn awyddus i ddechrau defnyddio’r enw ar unwaith – hyd yn oed os bydd rhaid gwneud hynny’n anffurfiol ar y dechrau.
Bydd y mater yn cael ei drafod yn adeilad y Senedd ddydd Mawrth nesaf.
Ar Facebook, mae sylwadau Hutt wedi cael eu hategu gan Aelod Seneddol Ceidwadol Sir Feirionnydd, Glyn Davies, a ddywedodd y dylid fod wedi newid enw’r sefydliad “flynyddoedd yn ôl”.
Wrth drafod Mesur Cymru, mae anghytundeb o hyd rhwng Llywodraeth Cymru a Llywodraeth Prydain ynghylch datganoli trethi i Gymru heb gynnal refferendwm yn gyntaf.
Tra bod y Llywodraeth Geidwadol yn San Steffan yn awyddus i drosglwyddo grym ar unwaith, mae Llywodraeth Cymru’n awyddus i fynd i’r afael â’r hyn y maen nhw’n ei alw’n “dan-gyllido” i Gymru o du Llundain.
