Comisiynydd - gawl am gyfarfod brys (Llun y swyddfa)
Mae swyddfa Comisiynydd y Gymraeg yn cysylltu â chwmni Starbucks i ofyn am gyfarfod brys yn dilyn honiadau bod cwsmer yn eu siop goffi yn Aberystwyth wedi cael gorchymyn i “siarad Saesneg neu adael” gan aelod o staff.
Yn ôl datganiad ar ran swyddfa’r Comisiynydd, fe fydd yn “pwysleisio statws swyddogol y Gymraeg yng Nghymru a’r sefyllfa gyfreithiol ynglŷn â pheidio ag ymyrryd â rhyddid pobol i ddefnyddio’r Gymraeg â’i gilydd.
“Bydd yn gofyn am gyfarfod brys i drafod y mater.”
Galw am y sac
Fe ddaeth y digwyddiad i’r amlwg ddoe wedi i Gwawr Edwards, sydd yn gantores soprano glasurol ac yn gyn-enillydd yn Eisteddfod Ryngwladol Llangollen, ddweud ei bod hi wedi bod yn dyst i’r digwyddiad.
Yn ôl y gantores, sydd yn wreiddiol o Geredigion, roedd hi’n “warth” fod yr aelod o staff wedi ceryddu’r cwsmer am geisio archebu coffi yn y Gymraeg.
Mae’r digwyddiad eisoes wedi cael ei feirniadu gan ymgyrchwyr iaith ac mae’r actor, Julian Lewis Jones, wedi trydar i alw ar i Starbucks ddiswyddo’r “diawl”.
@gwawredwards @StarbucksAber Ein Gwlad,Ein Iaith,Ein Pobol- mae rhaid gwneud Eisiampl o'r Person yma Rwan-Sacio'r Diawl.
— Julian Lewis Jones (@JulesLewisJones) April 20, 2016
Mae Starbucks wedi dweud eu bod yn ymchwilio i’r mater.
